Paneli Zgjedhori për Ankesa dhe Parashtesa (PZAP) ka marrë tre vendime në favor të Lëvizjes Vetëvendosje, duke urdhëruar Komisionin Qendror të Zgjedhjeve (KQZ) që të shpallë të vlefshme fletëvotimet që ishin shpallur fillimisht të pavlefshme nga komisionerët.
Kjo ka ndodhur pas ankesave të bëra nga VV, të cilat PZAP i ka konsideruar të bazuara.
Në një rast në Gjakovë, një fletëvotim që ishte shpallur i pavlefshëm gjatë numërimit të votave në Qendrën Komunale të Numërimit u rishqyrtua, dhe PZAP urdhëroi KQZ-në ta shpallë të vlefshëm.
PZAP arsyetoi se shenja tik ishte vendosur në hapësirën për subjektin politik Vetëvendosje, me një depërtim të lehtë jashtë katrorit, por pa shkelur rregullat zgjedhore.
Një situatë e ngjashme ndodhi edhe në sallën "1 Tetori" në Prishtinë, ku pas ankesës së VV-së, PZAP urdhëroi që edhe ky fletëvotim të shpallej i vlefshëm.
Po ashtu, një rast i tretë ka ndodhur në Pejë, ku një fletëvotim ishte shpallur i pavlefshëm për shkak të shenjës tik jashtë katrorit.
Pas shqyrtimit të ankesës, PZAP urdhëroi që kjo votë të përfshihej në rezultatin zgjedhor.
