LVV me epërsi të thellë - KQZ jep detaje nga procesi i numërimit të votave nga diaspora

Komisioni Qendror i Zgjedhjeve (KQZ) ka filluar procesin e numërimit të votave të ardhura nga diaspora. Zëdhënësi i KQZ-së, Valmir Elezi, ka thënë se numërimi i fletëvotimeve nga votimi jashtë Kosovës, përmes postës, është duke u zhvilluar në Qendrën e Numërimit dhe Rezultateve (QNR).

Sipas Elezit, gjatë ditës së parë janë numëruar rreth 30 kuti votimi nga gjithsej 178 kuti që përmbajnë fletëvotimet e ardhura përmes postës.

Elezi theksoi se KQZ-ja është duke zbatuar Ligjin për zgjedhje të përgjithshme dhe aktet nënligjore, duke ndjekur të gjitha hapat e parashikuara për të arritur deri te shpallja e rezultatit përfundimtar për subjektet politike dhe kandidatët për deputetë.

Elezi: Janë numëruar gjatë ditës së parë rreth 30 kuti të votimit

"Aktualisht në Qendrën e Numërimit dhe Rezultateve jemi duke vazhduar me numërimin e fletëvotimeve nga votimi jashtë Kosovës, respektivisht nga votimi përmes postës. Janë numëruar gjatë ditës së parë (të premten) rreth 30 kuti të votimit në përgjithësi në këtë proces të numërimit nga votimi përmes postës janë 178 kuti votimi pra me fletëvotime që i takojnë votimit jashtë Kosovës, në këtë rast votimit përmes postës. Numri i përgjithshëm i pakove të supozuara me fletëvotime të cilat janë të aprovuara dhe që do të numërohen gjatë ditëve në vazhdim është më shumë se 63 mijë", deklaroi ai.

Ai ka thënë KQZ mbetet e përkushtuar për të siguruar një proces transparent dhe të saktë të numërimit të votave, duke respektuar vullnetin e qytetarëve të Kosovës që kanë marrë pjesë në zgjedhje.

Në lidhje me kohëzgjatjen e këtij procesi, Elezi u shpreh se “po punojmë maksimalisht që brenda disa ditëve të arrijmë të përmbyllim numërimin e të gjitha fletëvotimeve”.

Elezi: Po punojmë maksimalisht që brenda disa ditëve të përmbyllim numërimin e të gjitha fletëvotimeve

"Po punojmë maksimalisht që brenda disa ditëve të arrijmë të përmbyllim numërimin e të gjitha fletëvotimeve, në mënyrë që pastaj të bëjmë dhe shpalljen e rezultatit përfundimtar. Se sa kohë do të marr ky proces varet nga dinamika e punës së ekipeve te numërimit, të cilët sigurisht punën kryesore që e kanë gjatë këtij procesi është saktësia në numërim, në mënyre që të evidentohet çdo votë e qytetarëve të Republikës së Kosovës, të cilët kanë marr pjesë në votime", ka shprehur Elezi.

Pas përfundimit të numërimit të votave nga diaspora dhe përfaqësitë diplomatike, KQZ do të fillojë numërimin e votave me kusht dhe atyre të personave me nevoja të veçanta. Ky proces pritet të zhvillohet në ditët në vijim, me qëllim që të përmbyllet sa më shpejt dhe të shpallen rezultatet përfundimtare të zgjedhjeve.

Në përgjithësi, numri i shtetasve të Kosovës të regjistruar për të votuar jashtë Kosovës ishte 104 mijë e 924, prej të cilëve 20 mijë e 324 ishin regjistruar për votim në përfaqësi diplomatike dhe votuan 15 mijë 352, ndërkaq për votimin përmes postës ishin regjistruar 84,600 shtetas.

Duke u mbështetur në të dhënat e KQZ-së, numri i zarfeve me fletëvotimeve nga vendvotimet me kusht është 12 mijë e 801, të cilat gjithashtu do t’i nënshtrohen verifikimit, i cili përfshin krahasimin me listën e votuesve të nënshkruar në vendvotime të rregullta. Ndërkaq, numri i votave të personave me nevoja të veçanta është 2 mijë e 597 vota.

Komisioni Qendror i Zgjedhjeve deri më tani ka numëruar 14.36% të votave të ardhura përmes postës me përditësimin e fundit në faqen zyrtare që u bë mbrëmë në orën 23:25.

Lëvizja Vetëvendosje deri më tani ka marrë 44.33 % të votave, ndërsa kandidati i saj për kryeministër, Albin Kurti, ka 2520 vota.

E dyta është Lidhja Demokratike e Kosovës që deri më tani ka 33.55% të votave me postë, ndërsa kandidati për kryeministër, Lumir Abdixhiku, ka 1770 vota.

Në vend të tretë aktualisht qëndron koalicioni i AAK-së dhe Nismës me 9.68%, ndërsa kandidati për kryeministër, Ramush Haradinaj, ka 539 vota. Kryetari i Nismës, Fatmir Limaj, ka 154 vota.

E katërta është Partia Demokratike e Kosovës me 6.48 %, ndërsa kandidati i saj për kryeministër, Bedri Hamza, ka 365. Ndërkaq, kryetari i kësaj partie, Memli Krasniqi, ka marrë 169 vota.

KQZ mbrëmë tha se po vazhdon numërimi i votave me postë se procesi i numërimit është transparent dhe po zhvillohet në prezencë të vëzhguesve të akredituar.

Të gjithë shtetasit e Kosovës, që gjatë regjistrimit u përcaktuan individualisht për të votuar përmes postës, mund të dërgonin pakon e tyre me fletëvotim në adresë të ndonjërës nga kutitë postare të Komisionit Qendror të Zgjedhjeve të hapura në shtete të ndryshme.

Numri i pakove të supozuara me fletëvotime dhe që janë aprovuar nga KQZ, pas procesit të vlerësimit, është më shumë se 63 mijë sosh.

Gjithashtu, ende nuk ka përfunduar numërimi i votave të përfaqësive diplomatike me 95.35% të votave të numëruara deri më tani.

Komisioni Qendror i Zgjedhjeve (KQZ) ka filluar publikimin e rezultateve të para të votave të dërguara me postë nga diaspora, ndërsa procesi i numërimit është ende në vazhdim.

Pas procesimit të 8.51% të votave (16 nga 188 kuti), Lëvizja Vetëvendosje (LVV) kryeson me 1,293 vota (45.79%), e ndjekur nga Lidhja Demokratike e Kosovës (LDK) me 1,010 vota (35.76%).

Në vendin e tretë është Aleanca për Ardhmërinë e Kosovës (AAK) dhe Nisma Socialdemokrate me 335 vota (11.86%).

Partia Demokratike e Kosovës (PDK) deri më tani ka siguruar 98 vota (3.47%), ndërsa partitë e tjera kanë marrë më pak se 1% të votave të numëruara.

Procesi i numërimit do të vazhdojë edhe në orët në vijim, ndërsa rezultatet pritet të pasqyrojnë ndikimin e diasporës në zgjedhjet e fundit.

Në Qendrën e Numërimit dhe Rezultateve (QNR) vazhdon edhe sot procesi i numërimit të votave të ardhura nga jashtë Kosovës, konkretisht e fletëvotimeve të dërguara përmes postës nga diaspora.

Deri më tani është numëruar një kuti të fletëvotimeve të dërguara përmes postës të qytetarëve nga Gllogoci që jetojnë në diasporë.

Deri më tani Partia Demokratike e Kosovës po prinë me 178 vota, duke pasuar nga Lëvizja Vetëvendosje me 139 vota.

LDK-ja deri më tani ka marë 42 vota, ndërsa AAK ka marrë 6 vota.

Kujtojmë se mërgimtarë nga diaspora nga komuna e Gllogocit që kanë votuar përmes postës është 1107.

Në Qendrën e Numërimit dhe Rezultateve (QNR) vazhdon edhe sot procesi i numërimit të votave të ardhura nga jashtë Kosovës, konkretisht e fletëvotimeve të dërguara përmes postës nga diaspora.

Deri më tani janë numëruar 3 kuti të fletëvotimeve të dërguara përmes postës të qytetarëve nga Gjakova që jetojnë në diasporë.

Janë publikuar rezultatet preliminare ku deri më tani Lidhja Demokratike e Kosovës po prinë me 517 vota, duke pasuar nga Lëvizja Vetëvendosje më 318 vota.

AAK deri më tani ka marë 53 vota, IRDK ka marrë 33 vota ndërsa PDK ka marrë 21 vota.

Kujtojmë se mërgimtarë nga diaspora nga komuna e Gjakovës që kanë votuar përmes postës janë 4156.

Komisioni Qendror i Zgjedhjeve ka nisur sot me numërimin e fletëvotimeve të ardhura me postë nga diaspora.

Eugen Cakolli nga Institutit Demokratik të Kosovës ka publikuar listën me numrin e fletëvotimeve të cilat do të numërohen komunë për komunë.

“Kjo është lista e komunave, nga të cilat janë votuesit që kanë dërguar fletëvotimet e tyre me postë, në kuadër të votimit jashtë vendit. Këto vota, në QNR, do të numërohen komunë për komunë. Megjithatë, duhet theksuar që diaspora si strukturë demografike, nuk është aq heterogjene, andaj edhe do të ishte deri diku i çuditshëm (e mbase indikativ) ndonjë rezultat fort i ndryshëm nga votat në misione diplomatike, sepse fundja, po flasim për grupin e njëjtë socio-kulturor brenda shteteve të ndryshme”. ka shkruar Cakolli në Facebook.

Nga lista e publikuar vërehet se numri më i madh i fletëvotimeve është në Prizren, gjithsej 4 mijë e 901. Pastaj, Prishtina me 4 mijë e 851 fletëvotime, Gjilani me 4 mijë e 480 fletëvotime.

Peja me 4 mijë e 362 fletëvotime dhe Gjakova me 4 mijë e 156 fletëvotime.

Zgjedhjet parlamentare janë mbajtur më 9 shkurt.

Në Qendrën e Numërimit dhe Rezultateve ka përfunduar numërimi i votave nga përfaqësitë diplomatike dhe tani ka filluar numërimi i votave të ardhura me postë.

Më 8 shkurt 2025 është votuar në 30 përfaqësi diplomatike me gjithsej 43 vendvotime dhe sipas të dhënave nga 20,324 votues të regjistruar kanë votuar 75.57% e tyre apo 15,352 shtetas të Kosovës që gjatë regjistrimit kishin përzgjedhur këtë mënyrë votimi.

Përndryshe, nga 104,924 shtetas të regjistruar për votim jashtë Kosovës, 84,600, ishin regjistruar për të votuar përmes postës dhe 20,324 të tjerë ishin regjistruar për votimin fizik në përfaqësitë diplomatike.

Nga 20,324 në përfaqësi diplomatike kanë votuar 15,352 votues, ndërkaq në votimin përmes postës KQZ ka pranuar rreth 69 mijë pako me fletëvotime

Deri më tani janë numëruar 40 nga gjithsej 43 kuti votimi në përfaqësitë diplomatike, sipas rezultateve preliminare.

Lëvizja Vetëvendosje (VV) kryeson me 80.75% të votave. Pas saj radhitet Partia Demokratike e Kosovës (PDK) me 7.48%, ndërsa Lidhja Demokratike e Kosovës (LDK) ka marrë 7.45% të votave.

Aleanca për Ardhmërinë e Kosovës (AAK) ka siguruar 1.93% të votave, ndërsa Koalicioni për Familjen ka marrë 0.76%.

Numërimi i votave të hedhura në 30 përfaqësi diplomatike ka nisur të mërkurën pasdite dhe, sipas Komisionit Qendror të Zgjedhjeve (KQZ), përfundimi i këtij procesi i paraprin numërimit të mbi 15 mijë votave të dërguara me postë.

Janë numëruar mbi 93% e votave të hedhura në përfaqësitë diplomatike të Kosovës nëpër botë, ku VV prin bindshëm. Përditësimi i fundit është bërë mëngjesin e sotëm në orën 07:59 minuta.

Pas numërimit të 40 nga 43 vendvotimeve, VV ka marrë mbi 80% të votave ose pothuajse 11 mijë sosh.

PDK është e dyta në diasporë me 1010 vota, ndërsa LDK e treta me 1006 vota.

AAK-NISMA ka marrë deri më tash 260 vota.

Vlen të theksohet se votat e diasporës me postë do të fillojnë të numërohen sot.

Komisioni Qendror i Zgjedhjeve nuk ka për përditësim të të dhënave  për rezultatin e numrimit të votave nga përfaqësitë diplomatike që nga ora 18:56 të së enjtës.

Sipas faqës zyrtare, Komisioni Qendror i Zgjedhjeve ka bërë të ditur se pas numërimit të mbi 67 për qind të votave nga përfaqësitë diplomatike, Lëvizja Vetëvendosje prin me 81.97 për qind apo 5.581 vota.

Në vendin e dytë është Lidhja Demokratike e Kosovës me 511 vota, apo 7.50 për qind.

Rezultatet në kohë reale

Partia Demokratike e Kosovës ka fituar 6.14 për qind apo 418 vota, pasuar nga koalicioni Aleanca për Ardhmërinë e Kosovës, Nisma Socialdemokrate, Konservatorët e Intelektualët me 1.50 për qind apo 102 vota.

Më 8 shkurt, për herë të parë Kosova organizoi votim fizik të pjesëtarëve të mërgatës në përfaqësitë diplomatike të shtetit në botë. Votimet u mbajtën në 43 vendvotime në 16 ambasada dhe 14 konsullata të Kosovës, në 19 shtete të ndryshme të botës.

Pjesëmarrja në votimet në ambasada dhe konsullatat e Kosovës nëpër botë ishte 73.56 për qind, përkatësisht nga 20.324 persona të regjistruar për të votuar në përfaqësitë diplomatike, 15.552 prej tyre e shfrytëzuan këtë të drejtë.