Zëvendësministri i Drejtësisë, Blerim Sallahu, ka sqaruar se çfarë ndodhë nëse kryeministri Albin Kurti refuzon të dëshmojë në cilësinë e dëshmitarit në Prokurorinë Speciale.
Sallahu, përmes një postimi në Facebook, ka komentuar nenin 132 të Kodit për Procedurën Penale lidhur me mosparaqitjen e dëshmitarit.
“Janë dy situata që i rregullon neni 132 i Kodit për Procedurën Penale lidhur me mosparaqitjen e dëshmitarit për të dëshmuar: E para, ka të bëj për mosparaqitje. E dyta, për refuzim të dëshmisë”, ka shkruar Sallahu .
Tutje ai ka thënë se “sipas paragrafit të parë të nenit 132 të KPK-së, për mosparaqitje, mund të dënohesh nga gjyqtari i procedurës paraprake vetëm (jo me burg) me gjobë”.
“Pra, për secilën mosparaqitje dënohesh deri në 250 euro. Kësisoj, për mosparaqitje, dënimi shqiptohet vetëm me gjobë dhe se është përfundimtar, e i vazhdueshëm derisa nuk paraqitesh. Nëse paraqitesh, por nuk dëshmon së pari dënohesh me gjobë deri në 250 euro dhe më pastaj dënohesh me burg deri në 1 muaj. (shih pjesën e fundit të paragrafit 1 dhe paragrafin 2 të nenit 132)”.
Sallahu ka sqaruar se “pas mbajtjes së dënimit efektiv (me burg) gjyqtari nuk mund të urdhërojë dëshmitarin për të dëshmuar për rastin identik”.
“Secili vendim tjetër i gjykatës, është shkelje brutale e lirive dhe të drejtave të njeriut të përcaktuar me Kushtetutë dhe konventa ndërkombëtare!”, ka shkruar ai.
