Komisioni Qendror i Zgjedhjeve (KQZ) do të mbajë sot mbledhjen e radhës. Takimi do të nisë në orën 15:00 në zyrat e KQZ-së, ku pritet të shqyrtohet dhe miratohet një vendim i rëndësishëm sa u përket votave të diasporës.
Pika kryesore e rendit të ditës është shqyrtimi dhe miratimi i rekomandimit për hapjen e të gjitha kutive të votimit që përmbajnë fletëvotimet e dërguara nga votuesit jashtë Kosovës përmes postës. Ky vendim mund të ndikojë drejtpërdrejt në procesin zgjedhor dhe numërimin e votave që vijnë nga diaspora.
Përveç kësaj, anëtarët e KQZ-së do të shqyrtojnë dhe miratojnë procesverbalet e mbledhjeve të mëparshme dhe do të diskutojnë çështje të tjera të ndryshme.
Mbetet të shihet nëse rekomandimi i sekretariatit të KQZ-së për hapjen e kutive do të marrë mbështetjen e duhur nga anëtarët e KQZ-së dhe si do të ndikojë ky vendim në procesin zgjedhor./IndeksOnline/
