Kryeministri i vendit, Albin Kurti, ka thënë se Serbia ka ndërhyrë në zgjedhjet parlamentare të 9 shkurtit. Ai ka përmendur 7 instanca shtetërore e jo shtetërore serbe përgjegjëse për këtë ndërhyrje, teksa ndikimi është dalluar edhe te komunitetet e tjera jo-shumicë, përveç asaj serbe.
"Ndërhyrja e Serbisë në zgjedhjet tona parlamentare është një cënim që i bëhet demokracisë dhe sovranitetit të Republikës së Kosovës. Ajo ka ndikuar në zgjedhjen e deputetëve serb dhe të pakicave jo serbe, e të cilat janë nën kontrollin e plotë të presidentit të Serbisë, Aleksandër Vuçiq, të qeverisë e të inteligjencës dhe krimit të organizuar atje", ka thënë ai në konferencë të përbashkët me ministrin për Komunitete dhe Kthime, Nenad Rashiq.
Kurti ka thënë se vet presidenti i Serbisë, Aleksandër Vuçiq ka inkurajuar çdo aktorë shtetëror e jo shtetëror serb, që të përfshihet në zgjedhjet e Kosovës.
"Për këtë qëllim rol ekzekutiv ka pasur kryeterroristi Milan Radojcic, apo njeriu i cili ka marrë detyrat për Kosovën nga presidenti i Serbisë. Aparati shtetëror i Serbisë ka bërë përpjekje të jashtëzakonshme t'i dëmtojë subjektet rivale serbe, veçanërisht Partinë për Liri, Drejtësi e Mbijetesë të Nenad Rashiqit, ministrit tonë dhe Demokracia Serbe të Aleksandër Arsenijeviq, por edhe votuesit e subjekteve të komuniteteve tjera, kryesisht rom e ashkali", ka theksuar kryeministri.
Ai ka thënë se ndikimi i ndërhyrjes është dalluar në katër komunat veriore dhe gjashtë komunat me shumicë serbe. Ai ka potencuar tërheqjen e pothuajse të gjitha subjekteve politike serbe dhe bastisjen e qendrës për çështje sociale.
"Kemi identifikuar 7 instanca shtetëror e jo shtetëror të Serbisë. I pari është presidenti i Serbisë, Aleksandër Vuçiq, i dyti është kryeterroristi Milan Radojcic, pastaj është Petar Petkovic, BIA serbe, mediat serbe të kontrolluara në Beograd, Lista Serbe dhe së fundmi është edhe struktura ilegale përfshirë këtu Bankën Postare Kursimore, qendrat sociale, zyrat e pensioneve, MTS - telekomi i Serbisë si dhe ish-pjesëtarë të Policisë së Kosovës", ka thënë ai.
Kurti ka listuar 10 metoda të cilat aparati serb i ka përdorur karshi votuesve serb: joshja financiare, kushtëzimi financiar përmes rrezikimit të humbjes së beneficioneve, përçarja e rivalëve të Listës Serbe, shantazhi e presioni për mos mbështetje të asnjë subjekti përveç Listës, kërcënimi për t'u larguar nga këshillët e vendvotimeve, regjistrimi i 'votuesve të sigurt' përmes përpilimit të listave të caktuara, transporti i organizuar nga Serbia në Kosovë, organizimi kolektiv në qendra votimi, kontrollimi i votuesve dhe shenjëzimi i fletëvotimeve.
"Në zgjedhjet e fundit format e ndërhyrjes kanë dalluar për shkak të përmirësimit të dukshëm të sigurisë në katër komunat veriore, rezultat i sundimit të rendit e ligjit, luftimit të suksesshëm të grupeve kriminale dhe terroriste si dhe mbylljes së stukturave ilegale. Ndikimi i dikurshëm brutal e fizik, përfshirë këtu edhe rrahjet e vrasjet nuk ka qenë i mundur më. Si zëvendësim janë rritur format e tjera të kërcënimeve hibride, kryesisht joshja dhe kërcënimi financiar, shantazhi e frikësimet e kërcënimet, por edhe sulmet kibernetike", ka thënë Kurti.
Kurti ka përmendur edhe kërcënimin e drejtpërdrejtë të Nenad Rashiq nga Milan Radojcic, si dhe kërcënimet kibernetike të tij dhe të ministrisë që ai ka drejtuar.
