Sipas një hulumtimi të hollësishëm të kryer në dy shkolla amerikane, përkrahet qëndrimi se fëmijët nuk e përhapin koronavirusin në shkollë, nëse merren masat e duhura.
Nga 3.500 nxënës, vetëm 235 raste të koronavirusit u dokumentuan gjatë semestrit vjeshtor, raportuan hulumtuesit në një studim të publikuar në internet.
Në bazë të të dhënave të këtij hulumtimi, vetëm 9 për qind e nxënësve që sollën infeksione të reja në shkollë i infektuan të tjerët, shkruan CNN.
“Nuk pati dëshmi të transmetimit të virusit nga nxënësi te mësuesi ose nga mësuesi te nxënësi”, thuhet në studim.
“Sipas njohurive tona, ky është studimi i vetëm gjithpërfshirës dhe afatgjatë që i ka testuar të gjithë nxënësit e grupmoshës K-12 dhe stafin nga gushti deri në dhjetor, duke e bërë studimin e vetëm ku vërtet shohim gjasat për përhapjen e sëmundjes në këtë grupmoshë dhe përhapjen e vërtetë në shkolla”, tha Dr. Darria Long nga Universiteti i Tennessee-s, që punoi në këtë hulumtim.
Ekipi i hulumtuesve nuk i tregoi emrat e shkollave, për u tha se njëra ishte në pjesën juglindore të ShBA-së, ndërsa tjetra në pjesën lindore. Shkollat ishin duke i zbatuar masat e Qendrës për Kontrollimin dhe Parandalimin e Sëmundjeve, përfshirë përdorimin e maskave dhe distancën sociale.
“72 për qind e përhapjes së rasteve në shkollën A ishin të lidhura me mosrespektimin e rregullave për vendosjen e maskës”, thuhet në hulumtim.
“Fëmijët mund ta marrin dhe ta përhapin Covid-in, por shkalla e sëmundjes kur ata janë në shkollë është më e ulët sesa shkalla e sëmundjes kur ata janë jashtë saj, duke lënë të kuptohet se komunitetet janë në rrezik më të ulët kur fëmijët janë në shkolla”, thuhet më tej në studimin amerikan.
