Përmbytje si këto që shkaktoi uragani Ajda, Nju Jorku nuk kishte përjetuar ndonjëherë. I gjithë qyteti ra nën pushtetin e ujit prej reshjeve të dendura, duke bllokuar nëpër rrugë me mijëra automjete.
E njëjta situatë është në të gjitha shtetet federale të përshkuara nga vorbulla gjigante e Ajdës, që ka lënë pas deri tani 50 të vdekur, që kur preku tokën amerikane në shtetin juglindor të Luizianës, deri më tani që po përshkon verilindjen. Mes viktimave ka edhe fëmijë, më i vogli 2 vjeç. Pasojat më të rënda i ka Nju Xhersi që numëron gati gjysmën e numrit të përgjithshëm të vdekjeve. Presidenti amerikan Xho Bajden shpalli gjendjen e emergjencës si Nju Xhersi dhe Nju Jork.
Kryebashkiaku i Nju Jorkut Bill de Blasio tha se në një orë ranë 8 centimetra shi, që thyen rekordin e mëparshëm prej 5 centimetrash.
Uji ka nxjerrë jashtë funksionit pjesën më të madhe të sistemit të metrove, ndërsa veç dhjetëra mijëra ndërtesave të shkatërruara në periferitë e qyteteve, ujërat përmbytën katet e para të shtëpive, duke u bërë shkak edhe për shpërthime të tilla, nga prekja e linjave të energjisë elektrike.
Ekipet e emergjencës po u vijnë në ndihmë dhjetëra mijëra banorëve, ndërsa janë në kërkim të shumë të zhdukurve.
