Po të vini re Kamala Harris në daljet e saj publike, rrallëherë mungojnë perlat si aksesorë. Më shumë se e fiksuar pas tyre, kandidatja për Presidente në SHBA ka një histori që lidhet me to.
Më 19 gusht 2020, asokohe Senatore Kamala Harris mbante në qafë një gjerdan me perla teksa pranoi nominimin për nënpresidente demokrate. Kur doli në podium për të mbajtur fjalën e saj, ajo përgëzoi gratë që luftuan për të drejtën e votës e veçanërisht gratë e familjes së saj.
Më pas vuri theksin te “Alpha Kappa Alpha”. AKA është një organizatë sociale, ndër më të famshmet në Amerikë, ku marrin pjesë figura si Toni Morrison, aktorja Phylicia Rashad dhe poetja Maya Angelou. AKA pati një ndikim të madh në jetën e zëvendëspresidentes Harris. Ajo iu bashkua shoqatës në vitin 1986, kohë kur ishte studente në Universitetin Howard. Lidhja e saj me AKA nuk mori fund kur ajo u diplomua… Me shumë prej anëtareve të grupit ajo lidhi shoqëri të ngushtë. Ato e mbështetën në fushatën e saj në vitin 2020, duke bërë edhe donacione. Aktualisht AKA ka mbi 360 mijë anëtarë.
Po ç’lidhje ka AKA me perlat e Harris?
Perlat kanë qenë simbol i AKA për dekada me radhë. Themeluesit e saj quhen “Njëzet Perlat” dhe çdo personi që bëhet pjesë e grupit, në fillim i dhurohen 20 perla. Është një shenjë solidariteti mes tyre, për afro-amerikanët, për gratë…
E duket se Harris nuk e ka harruar asnjëherë këtë gjë. Ajo ka vënë perla në eventet më të rëndësishme të jetës së saj, nga diplomimi, betimi si Senatore e deri më sot në daljet e saj gjatë fushatës elektorale.
Për afro-amerikanët, perlat përfaqësojne ambicien dhe mençurinë.
Gjatë fjalimit të saj të pranimit në vitin 2020, Harris tha: “Çdo qenie njerëzore ka vlerë të pafundme, meriton dhembshuri, dinjitet dhe respekt”. Mesazhi i saj u përcoll te mijëra gra në të gjithë SHBA-në, shumë prej të cilave propozuan të mbanin perla në mbështetje të Harris. Një grup në Facebook i quajtur “United by Pearls” ka rreth 500,000 anëtarë.
