“Bëni histori”, ky është mesazhi i Joe Biden nga Shtëpia e Bardhë për votuesit për zgjedhjet amerikane, të cilat shfaqen si një garë e ethshme mes dy kandidatëve, Kamala Harris demokrate dhe Donald Trump republikan.
Presidenti amerikan u ka bërë thirrje njerëzve që të votojnë për Kamala Harris si pasuese të tij.
“Shkoni votoni”, shkruan ai në postimin e tij në X.Kujtojmë se Biden e braktisi garën për një mandat të ri, duke mbështetur Harrisin për presidencën, në korrik, pas një paraqitjeje të dështuar në debatin me Trump.
Biden u kthye në Shtëpinë e Bardhë dje pasi kaloi fundjavën në Delaware, me ndalesën e fundit të fushatës së tij në shtetin kyç të Pensilvanisë.
Ai po pret në Uashington për të parë nëse do t’ia dorëzojë pushtetin zëvendëspresidentes së tij apo do t’ia kthejë paraardhësit të tij, Trump.
