Qeveria amerikane ka ngritur akuza kundër një shtetasi afgan në lidhje me një komplot të dyshuar iranian për të vrarë Donald Trumpin përpara se ai të zgjidhej si presidenti i ardhshëm.
Departamenti i Drejtësisë të premten hapi një aktakuzë kundër Farhad Shakerit, 51 vjeç, duke pretenduar se ai ishte ngarkuar të “siguronte një plan” për të vrarë Trumpin.
Qeveria amerikane tha se Shakeri nuk është arrestuar dhe besohet të jetë në Iran, gjë që i përshkroi pretendimet si “plotësisht të pabaza”.
Në një kallëzim penal të paraqitur në gjykatën e Manhatanit, prokurorët pretendojnë se një zyrtar në Gardën Revolucionare të Iranit e udhëzoi Shakerin në shtator të hartonte një plan për të vëzhguar dhe vrarë Trump.
“Departamenti i Drejtësisë ka akuzuar një aset të regjimit iranian, i cili ishte ngarkuar nga regjimi për të drejtuar një rrjet bashkëpunëtorësh kriminalë për të çuar më tej komplotet e vrasjes së Iranit kundër objektivave të tij, duke përfshirë presidentin e sapozgjedhur Donald Trump”, tha në një deklaratë Prokurori i Përgjithshëm i SHBA Merrick Garland.
Departamenti i drejtësisë akuzoi gjithashtu dy persona të tjerë që dyshohet se ishin rekrutuar për të vrarë një gazetar amerikan, i cili ishte një kritik i hapur i Iranit.
Individët e tjerë u identifikuan nga departamenti i drejtësisë si Carlisle Rivera, i njohur gjithashtu si “Pop”, 49 vjeç, nga Brooklyn dhe Jonathon Loadholt, 36 vjeç, nga Staten Island.
Të dy u paraqitën në gjykatë në Distriktin Jugor të Nju Jorkut të enjten dhe janë ndaluar e janë në pritje të një gjyqi, shkruan BBC.
