LIVE: Nis ceremonia e betimit të Donald Trump si president i SHBA-së

Presidenti i zgjedhur i Shteteve të Bashkuara, Donald Trump, hyri në sallën e Kongresit amerikan, ku brenda pak minutash do të bëjë betimin si presidenti i 47-të i SHBA-së.

Ai u prit me duartrokitje nga të pranishmit.

Paraprakisht në sallë hyri edhe zëvendësi i tij, JD Vance.

Në sallën e Kongresit amerikan, ku do të mbahet ceremonia e inaugurimit të presidentit të zgjedhur të SHBA-së, Donald Trump, marrin pjesë edhe udhëheqësit e gjigantëve të teknologjisë:

Priscilla Chan, shefe ekzekutive e Meta-s (majtas) dhe Mark Zuckerberg i Facebook-ut.

Shefi ekzekutiv i Google, Sundar Pichai (majtas) dhe shefi ekzekutiv i Tesla-s, SpaceX-it dhe X-it, Elon Musk.

Largohemi vetëm për pak nga zhvillimet në Uashington, për të përcjellë urimin e presidentit rus, Vladimir Putin, për Donald Trumpin, përpara inaugurimit të tij si president i Shteteve të Bashkuara.

Putin tha se është i hapur për dialog me administratën e re të SHBA-së për përfundimin e konfliktit në Ukrainë, duke u bazuar në një “paqe të qëndrueshme”.

Rusia nisi pushtimin në shkallë të plotë të Ukrainës në shkurt të vitit 2022.

Qindra mijëra njerëz janë vrarë dhe plagosur në këtë konflikt.

Trump ka thënë se përfundimi i kësaj lufte do të jetë prioritet kyç i politikës së tij të jashtme.

Në komentet e tij më të fundit, ai tha se shpreson ta arrijë këtë brenda gjashtë muajsh, por nuk zbuloi ndonjë plan të detajuar për këtë qëllim./REL

Ish-presidentët e Shteteve të Bashkuara, Barack Obama, George W. Bush dhe Bill Clinton, kanë arritur tashmë në Kongresin amerikan, ku do të bëjë betimin presidenti i 47-të i Shteteve të Bashkuara, Donald Trump.

I pranishëm është edhe presidenti në largim, Joe Biden, nga i cili Trump merr detyrën.

Trump rikthehet në Shtëpinë e Bardhë, pasi mandatin e parë presidencial e ka shërbyer nga viti 2017 deri më 2021.

Presidenti i zgjedhur amerikan, Donald Trump, bashkë me presidentin në largim, Joe Biden, arritën në ndërtesën e Kongresit amerikan, ku do të zhvillohet ceremonia e inaugurimit të Trumpit.

Dy liderët u takuan paraprakisht në Shtëpinë e Bardhë dhe pinë çaj.

Presidenti i ri do të betohet në orën 17:47, sipas kohës në Kosovë.

Kjo orë është zgjedhur pasi që Trump do të bëhet presidenti i 47-të i Shteteve të Bashkuara.

Për shkak të motit të ftohtë, ceremonia e inaugurimit mbahet brenda dhe jo para ndërtesës së Kongresit, siç ndodh zakonisht.

Presidenti i 46-të i Shteteve të Bashkuara, Joe Biden, la përfundimisht Shtëpinë e Bardhë, duke u nisur bashkë me presidentin e zgjedhur, Donald Trump, drejt Kongresit, ku do të zhvillohet ceremonia e inaugurimit të Trumpit.

Biden shërbeu në këtë post një mandat katërvjeçar.

CNN raporton se Biden i la një letër Trumpit në Zyrën Ovale.

Donald Trump do të përdorë Biblën e Abraham Lincoln kur të betohet sot si president, njoftoi komiteti i tij i inaugurimit.

Lincoln përdori Biblën gjatë ceremonisë së tij të betimit në 1861, transmeton CNN .

Trump do të përdorë gjithashtu një Bibël personale kur të bëjë betimin. Të dyja Biblat u përdorën nga Trump gjatë inaugurimit të tij në 2017.

Ish-presidenti Barack Obama përdori Biblën e Linkolnit gjatë dy ceremonive të tij të inaugurimit.

Nënkryetari i sapozgjedhur JD Vance do të bëjë betimin duke përdorur një Bibël familjare që daton nga stërgjyshja e tij. 

Me Presidentin Donald Trump që u fut në Shtëpinë e Bardhë për të dytën herë, duke u mirëpritur nga Joe Biden, zv.presidenti JD Vance u mirëprit nga rivalja e Trump, Kamala Harris.

Harris dhe bashkëshorti i saj Emhoff përshëndetën Vances jashtë Shtëpisë së Bardhë përpara se të pozonin për një foto dhe të futeshin brenda për herë të fundit.

JD Vamnce, Usha Vance dhe tre fëmijët e tyre do të zhvendosen në rezidencën e Observatorit Detar menjëherë pas inaugurimit, e cila ka qenë shtëpia e zv.presidentëve të SHBA-së që nga viti 1970.

Më parë u përfol se bashkëshortja e Vance, Usha, kontaktoi bashkëshortin e Harris, duke kërkuar detaje rreth shtëpisë, mbi mënyrat për të pasur më shumë siguri për tre fëmijët e tyre të mitur.

Presidenti i zgjedhur, Donald Trump, dhe gruaja e tij, Melania, arritën në Shtëpinë e Bardhë, ku u pritën nga presidenti në largim, Joe Biden, dhe gruaja e tij, Jill.

Ata i përshëndetën duke i thënë: "Mirë se erdhe në shtëpi".

Të katër do të pinë çaj së bashku në Shtëpinë e Bardhë përpara se Trump të betohet më vonë në ndërtesën e Kapitolit.

Në ditën e inaugurimit të presidentit të zgjedhur amerikan, Donald Trump, shoqata e Kosovës “Miqtë e Amerikës” vendosi një flamur të ri pranë shtatores së ish-presidentit amerikan, Bill Clinton, në Prishtinë.

Kryetari i kësaj shoqate, Agim Rexhepi, tha se ky veprim tregon respekt për popullin aleat dhe mik amerikan.

“Shpresoj që presidenti Trump t’i vazhdojë politikat e të gjithë presidentëve të kaluar të SHBA-së - pavarësisht nëse ata ishin demokratë ose republikanë - në mbështetje të interesave të popullit shqiptar”, tha Rexhepi./REL