Presidenti Donald Trump tha të shtunën se ai mund ta shqyrtojë ribashkimin me Organizatën Botërore të Shëndetësisë, disa ditë pasi urdhëroi një dalje të SHBA nga agjencia globale e shëndetit, për atë që ai e përshkroi si një keqpërdorim të pandemisë COVID-19 dhe krizave të tjera shëndetësore ndërkombëtare.
“Ndoshta do të mendojmë ta bëjmë përsëri, nuk e di. Ndoshta do ta bëjmë. Ata do të duhej ta pastronin atë”, tha Trump në një tubim në Las Vegas.
SHBA-ja është planifikuar të largohet nga OBSH më 22 janar 2026. Trump e njoftoi këtë masë të hënën pasi u betua për një mandat të dytë në Shtëpinë e Bardhë.
SHBA-ja është deri tani mbështetësi më i madh financiar i OBSH-së, duke kontribuar rreth 18 për qind të financimit të saj të përgjithshëm. Buxheti më i fundit dyvjeçar i OBSH-së, për 2024-2025, ishte 6.8 miliardë dollarë.
Trump i tha turmës në Las Vegas se ishte i pakënaqur që SHBA paguan më shumë në OBSH sesa Kina, e cila ka një popullsi shumë më të madhe.
Ai shtoi se do t’i kërkojë Arabisë Saudite të bëjë një investim prej rreth 1 trilion dollarësh në SHBA, nga 600 miliardë dollarë që sauditët janë zotuar të investojnë.
Princi i Kurorës së Arabisë Saudite, Mohammed bin Salman i tha Trump javën e kaluar se mbretëria dëshiron të investojë 600 miliardë dollarë në investime të zgjeruara dhe tregti me SHBA-në gjatë katër viteve të ardhshme.
