Pas bisedimeve të sotme në Arabinë Saudite, sekretari amerikan i shtetit Marco Rubio tha se Ukraina ka thënë se do të pranojë një propozim të SHBA-së për një armëpushim 30-ditor dhe se “topi është tani në fushën e Rusisë”.
Duke folur në Jeddah, ai thotë se Ukraina dhe SHBA kanë ndërmarrë një “hap pozitiv” gjatë bisedimeve dhe shpreson se Rusia do të reagojë në të njëjtën mënyrë.
Këshilltari për sigurinë kombëtare, Mike Waltz shton se është “shumë e qartë” se Ukraina ndan vizionin e Donald Trump për paqen dhe thotë se “ata ndajnë vendosmërinë e tij për t’i dhënë fund luftimeve”.
Duke folur për hapat e ardhshëm, Rubio thotë se “do ti çojnë ofertën Rusisë.
“Ne do t’u themi atyre se kjo është ajo që kanë në tryezë, Ukraina është gati të ndalojë të shtënat dhe të fillojë të flasë, dhe tani do t’u mbetet atyre që të thonë po ose jo”, thotë ai.
“Shpresoj se ata do të thonë po, dhe nëse e bëjnë, atëherë mendoj se kemi bërë përparim të madh”
“Çdo ditë që kalon, njerëzit bombardohen dhe lëndohen nga të dyja anët e këtij konflikti”, u tha ai gazetarëve.
“Presidenti donte që kjo luftë të përfundonte dje dhe një ditë më parë”, tha Rubio.
Rubio thotë se shpresa e tij është se Rusia do të përgjigjet me po sa më shpejt që të jetë e mundur, në mënyrë që të mund të arrijnë në fazën e dytë të asaj, që është negociata reale, jo dialog i pafund.
“Gjesti i vullnetit të mirë që mund të shohim nga rusët është të shohin ofertën e Ukrainës dhe ta kthejnë përgjigje pozitive”, u tha Rubio gazetarëve.
