Pas grevave paralajmëruese dhe diskutimeve të nxehta, Volkswagen arriti një marrëveshje me sindikatat IG Metal.
Marrëveshja quhet "E ardhmja) Volkswagen" dhe kërkon një "reduktim të fuqisë punëtore". Nuk do të ketë mbyllje fabrikash, por mbi 35 mijë vende pune do të shkurtohen në Gjermani deri në vitin 2030 duke kursyer Volkswagen 1.5 miliardë euro në vit në kostot e punës.
Kapaciteti prodhues i kompanisë do të reduktohet gjithashtu me 734 mijë makina në vit për të përmbushur kërkesat.
Kryeshefi ekzekutiv i Grupit Volkswagen, Oliver Blume, tha se marrëveshja është një sinjal i rëndësishëm për qëndrueshmërinë e ardhshme të Volkswagen, automjeteve komerciale dhe fabrikave të komponentëve.
“Me paketën e masave të rënë dakord, kompania ka hartuar një rrugë vendimtare drejt së ardhmes së saj për sa i përket kostove, kapacitetit dhe strukturës. Tani jemi edhe një herë në një pozicion për të formuar me sukses fatin tonë”.
Në të ardhmen, fabrika e Volkswagen në Wolfsburg do të prodhojë modelet ID.3 dhe Cupra Born, por prodhimi i Golf dhe Golf Variant do të transferohet në Meksikë në vitin 2027. Deri në fund të dekadës, një Golf i ri elektrik dhe një model tjetër elektrik në të njëjtën platformë do të fillojnë prodhimin në Wolfsburg.
Fabrika në Emden do të vazhdojë prodhimin e modeleve ID.4 dhe ID.7, ndërsa ajo në Osnabrück do të ndalojë prodhimin e T-Roc Cabrio në mesin e vitit 2027. E ardhmja e kësaj fabrike duket e diskutueshme, por Volkswagen vuri në dukje se "opsionet janë duke u eksploruar".
Zwickau do të prodhojë Audi Q4 e-tron dhe Q4 e-tron Sportback, ndërsa fabrika në Drezden do të ndërpresë prodhimin e ID.3 në fund të 2025. Volkswagen tha se ishte duke eksploruar opsione për fabrikën, duke përfshirë "përdorimin e një pale të tretë".
Në Hanover, modelet komerciale ID.Buzz dhe Multivan do të mbeten në prodhim. Për më tepër, vendet e prodhimit të komponentëve të Volkswagen në Kassel, Braunschweig, Salzgitter, Hanover, Wolfsburg dhe Chemnitz do të mbahen. Megjithatë, këto lokacione do të pranojnë "modele të reja të orarit të punës".
