Spitalet në Siri janë në gatishmëri pasi u raportuan më shumë se 20 raste të kolerës dhe të paktën tri vdekje.
Shkaku kryesor i përhapjes së kolerës është ndotja e ujit të pijshëm, si dhe ujitja e bimëve me ujë të kontaminuar.
Infrastruktura e Sirisë është dëmtuar rëndë që nga fillimi i konfliktit në vend në mars 2011 dhe banorët e zonave të caktuara nuk kanë qasje në ujë të pastër.
Ministri i Shëndetësisë në Damask, Mohamed Samer Shahrour, i tha agjencisë së lajmeve shtetërore SANA, se ministria në koordinim me shërbimet lokale po punon në testimin e mostrave të ujit, si dhe frutave dhe perimeve.
Ai shtoi se spitalet në zonat nën kontrollin e Qeverisë kanë ilaçe për trajtimin e kolerës.
Tri vdekje u raportuan në një zonë të kontrolluar nga luftëtarët e mbështetur nga SHBA në Sirinë verilindore gjatë fundjavës.
Në qytetin e Alepos u raportuan 15 raste, duke përfshirë një nëntë vjeçar, i cili kishte simptoma të diarresë dhe të vjellave përpara se të shtrohej në spital.
Kolera u zbulua gjithashtu në një fabrikë akulli, e cila më pas u mbyll. Ministria e Shëndetësisë u bëri thirrje banorëve që të përdorin ujin nga burime të pastra dhe të lajnë mirë frutat dhe perimet para përdorimit.
