Policia në kryeqytetin indian, Delhi, ka bastisur shtëpitë e disa gazetarëve dhe autorëve në lidhje me një hetim për financimin e uebsajtit të lajmeve NewsClick.
Policia ka sekuestruar celularët dhe laptopët e atyre që bastisi mëngjesin e së martës.
Zyrtarët thuhet se po hetojnë pretendimet se NewsClick ka marrë fonde të paligjshme nga Kina – një akuzë që ajo e mohon, raporton BBC.
Nisur në vitin 2009, NewsClick është një uebsajt i pavarur lajmesh dhe aktualiteti, i cili njihet si kritik ndaj qeverisë. Në vitin 2021, ajo u bastis nga autoritetet tatimore për pretendimet për shkeljen e rregullave të investimeve të huaja direkte të Indisë.
Bastisjet e bashkërenduara në 30 vende të martën janë disa nga më të mëdhatë dhe më të gjera në mediat e Indisë në vitet e fundit. Udhëheqësit e opozitës e kanë quajtur atë “sulm të ri ndaj medias” të qeverisë së Partisë Bharatiya Janta (BJP).
Por ministri i Informacionit dhe Transmetimeve Anurag Thakur ka mohuar çdo përfshirje të qeverisë, duke thënë se agjencitë hetimore thjesht po bënin punën e tyre.
