Lideri kinez Xi Jinping dhe ai japonez Fumio Kishida u takuan në një takim të rrallë kokë më kokë në kuadër të samitit të APEC. Të dy liderët folën për rigjallërimin e marrëdhënieve të tyre.
Në takimin e tij të parë personal që prej një viti me kryeministrin japonez Fumio Kishida, presidenti kinez Xi Jinping tha se të dyja ekonomitë duhet të riafirmojnë marrëdhëniet e tyre strategjike.
Takimi midis Xi dhe Kishida u zhvillua në margjinat e samitit të Bashkëpunimit Ekonomik Azi-Paqësor (APEC) në San Francisko të enjten mbrëma.
Kishida postoi një foto të tij duke i shtrënguar dorën Xi në platformën e mediave sociale X, dikur Twitter.
"Samiti i parë Japoni-Kinë në një vit u mbajt me Presidentin Xi Jinping," shkroi ai.
Çfarë u tha?
Kishida tha se Kina dhe Japonia "ndajnë përgjegjësi reciproke për të kontribuar në paqen dhe prosperitetin botëror".
Ministria e Jashtme kineze tha se Xi i tha Kishidas se të dyja vendet janë të interesuara për bashkëjetesë paqësore, bashkëpunim dhe rritje së bashku.
Gjatë takimit të tyre, Xi tha se vendet duhet të "përqendrohen në interesat e përbashkëta dhe të menaxhojnë siç duhet dallimet", duke shtuar se Kina dhe Japonia duhet të riafirmojnë "marrëdhëniet e tyre strategjike reciproke të dobishme dhe t'u japin kuptim të ri".
Sipas televizionit shtetëror kinez, Kina dhe Japonia kanë rënë gjithashtu dakord të zhvillojnë më shumë dialog ekonomik të nivelit të lartë në kohën e duhur për të gjetur një mënyrë për të zgjidhur çështjen e shkarkimit të ujit të "kontaminuar" nga termocentrali i dëmtuar i Fukushimës.
Planet e ardhshme
Liderët e të dyja vendeve pritet gjithashtu të diskutojnë për formulimin e një kuadri të ri për të diskutuar eksportet dhe tregtinë, raportojnë mediat japoneze.
Në gusht, Kina vendosi një ndalim të plotë për frutat e detit nga Japonia, pas vendimit të Tokios për të lëshuar ujë radioaktiv të trajtuar nga centrali i Fukushimës.
Japonia gjithashtu mund të bëjë presion ndaj Kinës që të revokojë ndalimin e saj për frutat e detit, duke u përpjekur gjithashtu të sigurojë lirimin e qytetarëve japonezë të arrestuar nga autoritetet kineze.
