LIVE: Ashpërsohet lufta, Netanyahu ‘kërcënon’ Hamasin me “eliminim” – vjen thirrja e fuqishme nga Amerika

Grupi militant palestinez Hamas thotë se ka liruar dy shtetas rusë të mbajtur peng në territorin e shkatërruar nga lufta të Gazës me kërkesë të Vladimir Putin.

“Në përgjigje të përpjekjeve të presidentit rus, lëvizja islamike e rezistencës Hamas liroi të mërkurën dy të burgosur me nënshtetësi ruse, të cilët iu dorëzuan Kryqit të Kuq pak më parë”, tha brigada al Qassam, krahu ushtarak i Hamasit.

Më pas Kryqi i Kuq ua dorëzoi dy pengjet përfaqësuesve të Ministrisë së Jashtme ruse.

Kështu shtohet në deklaratë.

30 palestinezë, 16 të mitur dhe 14 gra, po lirohen të mërkurën në këmbim të lirimit të 10 pengjeve në Gaza, sipas zëdhënësit Dr. Majed Al-Ansari në Ministrinë e Punëve të Jashtme të Katarit.

10 shtetasit izraelitë që u liruan përfshinin pesë shtetas të dyfishtë: një shtetas të dyfishtë holandez, tre shtetas të dyfishtë gjermanë dhe një shtetas të dyfishtë amerikan, tha Katar, shkruan CNN.

Përveç kësaj, dy shtetas rusë dhe katër shtetas tajlandezë u liruan jashtë kornizës së marrëveshjes dhe iu dorëzuan Kryqit të Kuq Ndërkombëtar, tha Al-Ansari.

“Katari mbetet me shpresë se përparimi i bërë në ditët e fundit mund të mbahet dhe mund të arrihet një zgjatje e mëtejshme e marrëveshjes së pauzës humanitare”, tha Al-Ansari.

Presidenti Joe Biden tha të mërkurën se izraelito-amerikania Liat Beinin ishte liruar nga Hamasi pasi u rrëmbye gjatë një sulmi të grupit militant ndaj Izraelit më 7 tetor. Presidenti amerikan tha se zonja Beinin e kishte kaluar kufirin e Gazës dhe ishte i sigurt në Egjipt.

Zonja Beinin ishte mes 16 pengjeve të liruara të mërkurën nga Hamasi, në ditën e fundit të një zgjatje dy-ditore të armëpushimit në luftën e Gazës. Presidenti Biden tha se kishte folur me nënën dhe babanë e zonjës Beinin. “Ata janë shumë mirënjohës dhe gjërat po ecin mirë”, tha ai për gazetarët.

Hamasi liroi 16 pengje të mërkurën vonë në shkëmbimin e fundit për të burgosurit palestinezë të mbajtur nga Izraeli në bazë të një armëpushimi, ndërsa ndërmjetësit përpiqen të nënshkruanin një tjetër zgjatje armëpushimi për të lejuar shkëmbime të mëtejshme dhe për të zgjatur pauzën e ofensivës ajrore dhe tokësore të Izraelit.

Ushtria izraelite tha se një grup prej 10 grash dhe fëmijësh izraelitë dhe katër shtetas tajlandez u liruan nga Hamasi dhe u larguan nga Gaza. Më herët, dy gra ruso-izraelite u liruan nga Hamasi. Në këmbim Izraeli do të lironte 30 të burgosur palestinezë.

Ndërkohë, negociatorët po përpiqen të sigurojnë një zgjatje të mëtejshme të armëpushimit përtej afatit të së enjtes.

Bisedimet duket se po vështirësohen pasi janë liruar shumica e grave dhe fëmijëve të mbajtur nga Hamasi dhe militantët pritet të kërkojnë nga Izraeli lirimin e më shumë të burgosurve në këmbim të lirimit të burrave dhe ushtarëve të marrë peng nga militantët./VOA

Sekretari amerikan i Shtetit, Antony Blinken, mbërriti në Tel Aviv të enjten ku pritet të takohet me udhëheqësit izraelitë për të diskutuar zgjatjen e armëpushimit të përkohshëm të Izraelit me militantët e Hamasit dhe shtimin e ndihmës humanitare për Rripin e Gazës.

Kjo është vizita e tretë e zotit Blinken në rajon që nga sulmi vdekjeprurës i Hamasit në Izrael më 7 tetor. Kryediplomati amerikan pritet të vizitojë edhe Bregun Perëndimor të pushtuar, ku ka të ngjarë të takohet udhëheqësin e autoritetit palestinez, Mahmud Abbas, tha një zyrtar palestinez.

Diplomati i lartë amerikan pritet gjithashtu që të diskutojë edhe lidhur me ofensivën e afërt të Izraelit në Gazën jugore.

Shtetet e Bashkuara po i kërkojnë Izraelit që të tregohet shumë më i kujdesshëm për të mbrojtur civilët palestinezë dhe për të kufizuar dëmtimin e infrastrukturës në çdo ofensivë në jug, thanë zyrtarë të lartë amerikanë.

“Gjatë ditëve të ardhshme, do të përqendrohemi që të bëjmë atë që mundemi për të zgjatur pauzën në mënyrë që të vazhdojmë lirimin e më shumë pengjeve dhe dërgimin e më shumë ndihmave humanitare”, tha zoti Blinken gjatë një konference shtypi në Bruksel te mërkurën.

Armëpushimi ka sjellë pauzën e parë në Gaza në shtatë javë, gjatë së cilës Izraeli bombardoi rëndë territorin në përgjigje të një sulmi të dhunshëm nga militantët e Hamasit që vranë rreth 1200 njerëz dhe morën 240 pengje.

Izraeli është betuar se do ta asgjësojë Hamasin, i cili sundon Gazën. Autoritetet shëndetësore në Gaza thonë se bombardimi i Izraelit në territorin e vogël me popullsi të dendur ka vrarë deri më tani më shumë se 15,000 njerëz, rreth 40% e tyre fëmijë. Shifrat nuk mund të konfirmohen në mënyrë të pavarur.

Që nga fillimi i luftës, zoti Blinken ka zhvilluar bisedime me udhëheqës të lartë izraelitë dhe arabë në përpjekje për të frenuar përhapjen e konfliktit, nxitur lirimin e pengjeve dhe lehtësuar ndihmat për Gazën, ku po shfaqet një fatkeqësi humanitare.

Gjatë konferencës së shtypit në Bruksel, Sekretari Blinken tha se do të vazhdojë të diskutojë me partnerët rajonalë lidhur me të ardhmen e Gazës pas konfliktit. Shtetet e Bashkuara janë shprehur se nuk duan që Gaza të pushtohet apo të mbetet në shtetrrethim dhe nuk duan që palestinezët të zhvendosen përgjithmonë apo territori i Gazës të tkurret./VOA

Persona të armatosur kanë hapur zjarr në një stacion autobusi në Jerusalem, duke plagosur shtatë persona, sipas policisë izraelite.

Dy viktima ishin në gjendje kritike, tha shërbimi i ambulancës së Izraelit Magen David Adom, raporton Sky News, përcjell Bota sot.

Policia tha se dy sulmuesit e dyshuar "u neutralizuan në vend".

Sulmi ndodhi përgjatë një autostrade kryesore në periferi të qytetit gjatë orës së pikut, sipas policisë izraelite.

Paramedikët po trajtonin të lënduarit, tha shërbimi i ambulancës, i cili është anëtar i Lëvizjes Ndërkombëtare të Kryqit të Kuq dhe Gjysmëhënës së Kuqe.

Vetëm pak minuta para përfundimit të armëpushimit, Hamasi ka rënë dakord ta zgjasë atë – pak çaste pas një deklarate të ngjashme nga Izraeli.

Katari, i cili ka vepruar si ndërmjetës, tha se të dyja palët kanë rënë dakord për një ditë tjetër të marrëveshjes së përkohshme, raporton Sky news, përcjell Bota sot.

Negociatat për zgjatjen e saj për herë të dytë erdhën në tela, me mosmarrëveshjet e minutës së fundit mbi pengjet që do të liroheshin nga Hamasi.

Armëpushimi i përkohshëm po zgjatej me të njëjtat kushte si zgjatja e parë, sipas ministrisë së jashtme të Katarit.

Kjo marrëveshje përfshinte që Hamasi të lironte 10 pengje izraelite në ditë në këmbim të 30 të burgosurve palestinezë dhe Izraeli të lejonte më shumë ndihmë në Gaza.

Zgjatja do t'i lejojë negociatorët të vazhdojnë të punojnë për marrëveshjet për shkëmbimin e pengjeve për të burgosur.