Një zyrtar palestinez tha se numri i të burgosurve palestinezë në burgjet izraelite që nga 7 tetori është rritur me 130 për qind. Qaddoura Fares, kreu i Autoritetit për Çështjet e të Burgosurve dhe Ish-të Burgosurve, e përshkroi situatën e të burgosurve palestinezë në burgjet izraelite si “katastrofike dhe jashtëzakonisht të rrezikshme”.
Ai vuri në dukje se të arrestuarit janë të ekspozuar ndaj torturës dhe sulmeve sistematike dhe se “udhëtimi i torturës fillon që nga momenti i hyrjes në shtëpi dhe sulmit ndaj të arrestuarit dhe familjes dhe sabotimit të pronave të shtëpisë”.
Ai tha se dimri i kaluar ishte stina më e vështirë e dimrit për të burgosurit pasi autoritetet e burgjeve izraelite i privuan ata nga rrobat dhe batanijet e duhura, si dhe ua merrnin rregullisht rrobat e tyre.
Zyrtari palestinez shtoi se numri i të burgosurve palestinezë në burgjet izraelite para 7 tetorit ishte rreth 5.000, por tani shifra pritet të arrijë në 12.000, duke përfshirë të burgosurit nga Gaza. “Askush nuk e di numrin e të burgosurve nga Gaza, këto janë vetëm pritje, por ajo që dokumentohet për të burgosurit në burgjet izraelite arrin në 9.500”, shtoi Fares. Ai vuri në dukje se në mesin e të burgosurve ka rreth 80 gra, mbi 200 fëmijë dhe gati 4.000 të mbajtur nën paraburgimin administrativ izraelit pa akuza ose gjyq.
