Është një tjetër natë pa gjumë për Bejrutin pasi sulmet ajrore izraelite në Dahieh, në periferitë jugore të qytetit, janë intensifikuar, përcjell BBC.
Çdo disa minuta dëgjoj shpërthime të forta - disa më të forta se tjerat.
Nga ballkoni im edhe një herë mund të shoh kolona tymi dhe një dritë portokalli të ndritshme mbi qiejt e Dahieh.
Fqinjët e mi janë të gjithë zgjuar dhe me çdo shpërthim vrapojnë në ballkonin e tyre për të parë se ku goditi sulmi ajror.
Ne mund të dëgjojmë një dron që gumëzhin në qiell mbi qytet - dhe si në dy ditët e fundit edhe ky po fluturon kaq ulët.
Pak para valës së re të sulmeve ajrore, një zëdhënës i ushtrisë izraelite lëshoi një paralajmërim për civilët që jetonin në tre lagje të Dahieh duke u kërkuar atyre që të largoheshin menjëherë nga shtëpitë e tyre.
Ai u publikua në X në orën 22:55 me orën lokale dhe më pas më pak se 30 minuta më vonë u dëgjua një shpërthim i madh edhe në lagjen tonë që është larg nga vendi i sulmit.
Kjo ndodh ndërkohë që mijëra njerëz tashmë janë zhvendosur pasi janë larguar nga Dahieh ndërsa sulmet ajrore të Izraelit janë intensifikuar në atë zonë. Shumë janë duke fjetur në rrugë pasi nuk ka mjaft strehimore.
