Tre persona vdiqën dhe 15 të tjerë u plagosën pasi një burrë sulmoi me thikë brenda një supermarketi Walmart në Shangai të hënën mbrëma.
Policia kineze tha se arrestoi një burrë 37-vjeçar me emrin Lin në vendngjarje, duke shtuar se ai kishte ardhur në Shangai për të “shfryrë zemërimin e tij për shkak të një mosmarrëveshjeje ekonomike personale”. Hetimet e mëtejshme po vazhdojnë.
Incidenti ndodhi në një qendër tregtare në Songjiang, një lagje me popullsi të dendur në jugperëndim të qytetit, e cila është gjithashtu shtëpia e disa universiteteve.
Policia tha se tre personat që vdiqën u nënshtruan plagëve të marra në spital. Të tjerët “nuk kanë marrë plagë kërcënuese për jetën” dhe nuk besohet se janë në rrezik.
Diskutimet rreth incidentit tani duket se janë censuruar në mediat sociale kineze.
Supermarketi ishte i hapur për punë të martën por me siguri shtesë.
Armët e zjarrit janë të ndaluara në Kinë, por vendi ka parë një sërë sulmesh me thika muajt e fundit.
Muajin e kaluar, një nxenes japonez 10-vjeçar vdiq një ditë pasi u godit me thikë pranë shkollës së tij në Kinën jugore.
