LIVE: Ushtria izraelite publikon pamjet me të cilat pretendon se trupat e saj janë “futur” në Liban – Irani kërcënon me Lindjen e Mesme!

Këshilli i sigurimit të OKB-së është mbledhur menjëherë pas sulmeve me raketa të Iranit drejt Tel Avivit.

Ambasadorja amerikane në OKB e quan sulmin raketor ndaj Izraelit një përshkallëzim të rëndësishëm të tensioneve në Lindjen e Mesme.

Linda Thomas-Greenfield thotë se këshilli duhet të ndërmarrë veprime të menjëhershme.

Ajo i bën thirrje OKB-së që të dënojë Iranin për sulmin dhe të imponojë pasoja të rënda.

Në një kohë kur Izraeli duket se po “shënjestron” si pjesë e “përgjigjes” së tij infrastrukturën prodhuese të energjisë të Iranit, qoftë në lidhje me platformat e naftës dhe gazit natyror apo edhe objektet e tij bërthamore, me synimin për ta gjunjëzuar vendin ekonomikisht, iranianët kërcënojnë se do t’i vënë flakën gjithë Lindjes së Mesme.

Në veçanti, prej disa orësh Garda Revolucionare ka përdorur kanalet që ata kontrollojnë në Telegram për të lëshuar kërcënime që, nëse realizohen, do të nënkuptojnë “shembjen” e Lindjes së Mesme si një shtyllë energjie.

Konkretisht, këto burime pohojnë se nëse Izraeli vendos të sulmojë industrinë e naftës të Iranit, do të përgjigjet me goditje ndaj objekteve të naftës në Azerbajxhan, Oman, Arabinë Saudite dhe Emiratet e Bashkuara Arabe.

Këto janë vende që janë të lidhura në një mënyrë ose në një tjetër me Izraelin dhe që kundërshtojnë “boshtin e rezistencës” iraniane.

Azerbajxhani, nga ana tjetër, mban marrëdhënie të ngushta me Izraelin dhe për shkak të programeve të tij të armëve, Arabia Saudite është rivali i madh i Iranit për dominim në botën arabe, ndërsa Emiratet e Bashkuara Arabe janë shteti arab që iu afrua më shumë paqes me Izraelin në kornizën e Marrëveshjeve të Abrahamit që u nënshkruan në epokën e Donald Trump.

Ndërsa Omani gjithashtu refuzon të pranojë “udhëheqjen” e Iranit në rajon për shkak të veçorive fetare.

Të gjitha vendet prodhuese të naftës që në fakt janë ato që furnizojnë Europën me energji, pas “embargos” ndaj naftës ruse. Pasojat e një sulmi të tillë sigurisht që do të ishin të pallogaritshme si për ekonominë botërore, ashtu edhe për ekonomitë e Bashkimit Europian, pasi e ardhmja e tij energjetike bëhet më… e dyshimtë.

Ushtria izraelite e njohur si IDF, ka publikuar pamjet që pretendon se shfaq trupat e saj duke u futur në jug të Libanit.

IDF-ja tha se trupat “kanë lokalizuar dhe shkatërruar infrastrukturën e Hezbollahut, që përfshinë lansuesit e raketave, eksplozivë nëpër depo dhe pajisje tjera ushtarake”.

Ky operacion ishte konfirmuar edhe nga Hezbollahu, që pretendonin se janë përgatitur dhe të gatshëm të përleshen me ushtrinë izraelite.

Në anën tjetër, IDF-ja ka paralajmëruar banorët e 24 fshatrave libaneze, që të evakuohen dhe të qëndrojnë sa më larg jugut.

Ndërkaq izraelitët kanë pranuar se në një pritë të organizuar nga militantët e Hezbollahut në Liban, është vra një komandant i ushtrisë izraelite. 

Ushtria izraelite thotë se po dërgon më shumë trupa përtej kufirit në Liban, me njësitë e rregullta të këmbësorisë që i bashkohen operacionit tokësor këtë mëngjes.

Kjo vjen pasi Hezbollahu tha më herët këtë mëngjes se luftëtarët e saj ishin përleshur me forcat izraelite në fshatin kufitar Adaisseh.

Redaktorja e sigurisë dhe mbrojtjes në Sky News, Deborah Haynes, raporton se zhurmat e forta mund të dëgjohen ndërsa Izraeli dhe Hezbollahu sulmojnë njëri-tjetrin në një “shkëmbim të vazhdueshëm të zjarrit të artilerisë”.

“Nëse Irani mendonte se sulmi i tij raketor kundër Izraelit do t’i pengonte forcat izraelite të vazhdonin ofensivën e tyre brenda Libanit – treguesit këtu janë absolutisht se nuk është kështu”, thotë Haynes, duke raportuar nga Izraeli verior.

“Që kur kemi qenë këtu, ka pasur shumë zjarr artilerie”, thotë ajo, duke shtuar se ka pasur gjithashtu një “një numër sirenash” që tregojnë se Hezbollahu qëllon drejt Izraelit.

“Padyshim që ndihet shumë më aktiv sot sesa dje”, shtoi Haynes.

Ushtria izraelite konfirmoi mbrëmë se po godiste “objektivat e Hezbollahut” në sulmet e reja ajrore në Liban. Zjarri dhe tymi ishin të dukshëm përgjatë Bejrutit në orët e para të mëngjesit.

Izraeli lëshon urdhër të ri evakuimi për Libanin jugor.

Ushtria izraelite po paralajmëron njerëzit që të evakuojnë 24 fshatra të tjerë në Libanin jugor.

Ky urdhër vjen pasi zyrtarët izraelitë u kërkuan ditën e djeshme banorëve në rreth 30 fshatra të tjerë në zonë që të evakuoheshin, pasi kishin nisur një inkursion tokësor.

“Evakuoni menjëherë shtëpitë tuaja. Kini kujdes, ju ndalohet të shkoni në jug. Çdo lëvizje në jug mund t’ju vërë në rrezik. Ne do t’ju njoftojmë kur të jetë e sigurt të ktheheni në shtëpi”, tha zëdhënësi i IDF-së Avichay Adraee në një postim në rrjetin social “X”.

Vazhdon të ketë shumë pak informacione se sa dëme shkaktoi sulmi raketor i Iranit ndaj Izraelit.

Në sulmin e tij të martën, Irani lëshoi ​​më shumë se 180 raketa balistike, tha qeveria e Izraelit. Disa nga raketat e lëshuara nga Irani ishin raketa hipersonike Fattah, me një shpejtësi maksimale të vlerësuar në 10,000 kilometra në orë, raporton The Guardian.

Sipas Gardës Revolucionare, 90% e raketave të saj goditën me sukses objektivat e tyre. Izraeli megjithatë thotë se shumica e raketave u kapën nga mbrojtja e tij ajrore dhe kjo deklaratë duket se mbështetet nga komentet e SHBA-së dhe Mbretërisë së Bashkuar, që luajtën rol të rëndësishëm në mbrojtjen e Izraelit.

Pamjet nga Izraeli qendror tregojnë zyrtarët duke inspektuar një gropë.

Nuk u raportua për të lënduar në Izrael, por një person u vra në Bregun Perëndimor të pushtuar, thanë autoritetet atje. Pamjet tregojnë raketat e rëna në Ramallah, në Bregun Perëndimor.

Zëdhënësi i ushtrisë izraelite Daniel Hagari tha se kishte “një numër të vogël” goditjesh. Ushtria izraelite publikoi video të një shkolle në qytetin qendror të Gadera, e cila u dëmtua rëndë nga një raketë iraniane.

Irani lëshoi ​​200 raketa mbi Izrael. Sulmi i dytë ushtarak i Teheranit erdhi si hakmarrje pas vrasjes së liderit të Hezbollahut, Hassan Nasrallah të premten nga një sulm ajror izraelit në kryeqytetin e Libanit, Bejrut dhe atij të Hamasit, Ismail Haniyeh në Teheran gjatë një shpërthimi me bombë, i dyshuar se u krye nga agjentët e Mosad, në 31 korrik 2024. Garda Revolucionare e Iranit në një komunikatë tha se raketat e nisura nga Teherani “goditën në zemër të tokave të pushtuara”. Raketat e Iranit mbërritën në Tel Aviv, pjesa dërrmuese e tyre u interceptuan në ajër nga sistemi “Iron Dome” dhe sistemet antiraketore amerikane në rajon, një pjesë e vogël e tyre ranë në tokën izraelite, ndonëse autoritetet nuk raportojnë viktima, të lënduar apo dëme materiale nga sulmi.

Në të njëjtën orë me sulmin e Iranit, në Izrael ndodhën dy sulme të tjera, njëri në një qendër tregtare në Tel Aviv dhe tjetri në metronë e Jaffa, një lagje e kryeqytetit izraelit. Sulmi i këtij të fundit i mori jetën 6 personave dhe disa të tjerë kanë mbetur të plagosur. Ngjarja është vlerësuar sulm terrorist.

Në valën e madhe të sulmit iranian, Presidenti amerikan, Joe Biden i dha udhëzime ushtrisë së Shteteve të Bashkuara për të “ndihmuar Izraelin në mbrojtjen e tij dhe të rrëzonin raketat” që kishin synuar shtetin hebre. Përmes një deklarate, Shtëpia e Bardhë bëri të ditur se “Biden dhe zv/presidentja Kamala Harris, kandidatja demokrate në zgjedhjet presidenciale të muajit të ardhshëm në SHBA, po monitorojnë sulmin e Iranit ndaj Izraelit nga dhoma e operacioneve të Shtëpisë së Bardhë”.

Deklarata e mëpasme nga Shtëpia e Bardhë erdhi nga këshilltari për Sigurinë Kombëtare gjatë një konference me gazetarët, Jake Sullivan i cili raportoi se sulmi iranian ndaj Izraelit ishte mposhtur dhe bërë i paefektshëm falë profesionalizmit të IDF dhe mbështetjes amerikane, dhe nuk shkaktoi viktima apo dëme në asetet e vendit, sipas të dhënave të deriatëhershme.

Nga ana tjetër, liderët e Iranit e vlerësojnë të suksesshëm sulmin. “Ne goditëm 3 baza izraelite me raketa hipersonike. Ne kemi goditur tre baza ushtarake izraelite pranë Tel Avivit”, njoftoi Garda Revolucionare iraniane në një deklaratë të lëshuar në Teheran pas lëshimit të dhjetëra raketave kundër Izraelit.

Udhëheqësi suprem i Iranit, Ali Khamenei tha se “fitorja vjen nga Zoti dhe pushtimi është afër”, duke shkruar në rrjetin social X pas sulmimt raketor ndaj Izraelit. Në mbrëmje në Teheran, grupe njerëzish u mblodhën para ambasadës palestineze duke valëvitur flamurin e Hezbollahut. Për mbështetësit e regjimit, Irani i arriti objektivat e sulmit ndaj armikut të përjetshëm.

Masoud Pezeshkian, presidenti i Iranit tha se sulmi i sotëm ishte një mësim për Izraelin. Ai mburri fuqinë ushtarake të Iranit duke thënë se armët e përdorur për sulmin e ndërmarrë këtë mbrëmje janë vetëm një pjesë e vogël e arsenalit ushtarak të Teheranit. “Kryeministri izraelit Benjamin Netanyahu duhet të jetë i vetëdijshëm se Irani nuk po kërkon luftë, por do të përballet me forcë me çdo kërcënim. Sulmi i sotëm ishte vetëm pjesë e fuqisë sonë, mos shkoni në luftë me Iranin”, shtoi ai.

Forcat izraelite të Sigurisë (IDF) pohojnë se do të kryejnë një sulm kundërpërgjigjës ndaj Iranit, por ende nuk dihet se kur. “Ne do të zgjedhim momentin për të përcaktuar ccmimin dhe do të demonstrojmë aftësinë tonë për sulme të sakta dhe befasuese, në përputhje me indikacionet që do të vijnë nga liderët”, tha shefi i Shtabit të Ushtrisë izraelite, gjeneral Herzi Halevi.

I ashpër ishte reagimi i kryeministrit izraelit, Benjamin Netanyahu i cili deklaroi se Irani bëri një gabim të madh se do të paguajë për sulmin e sotëm. “Irani bëri një gabim të madh dhe do të paguajë pasojat”, tha kryeministri izraelit gjatë mbledhjes së kabinetit të luftës. “Regjimi iranian nuk e kupton vendosmërinë tonë për t’u mbrojtur dhe vendosmërinë tonë për t’iu përgjigjur armiqve tanë. Sinwar dhe Deif (udhëheqësi i Hamasit, red.) nuk e kuptuan atë, Nasrallah dhe Shukr nuk e kuptuan atë, dhe ndoshta ka ata në Teheran që nuk e kuptojnë”, Është një nga pjesët e fjalimit të shkurtër të mbajtur nga Benjamin Netanyahu në hapje të mbledhjes së kabinetit të sigurisë, gjatë së cilës ai siguroi: “Do ta kuptojnë… kushdo që na sulmon, ne do ta sulmojmë”.