Dy agresorët me sa duket dolën nga një xhami aty pranë, më pas hapën zjarr në një prej vagonëve të tramvajit.
Një sulm terrorist në Jaffa, në zonën jugore të Tel Avivit, ndodhi në mbrëmjen e 1 tetorit pothuajse njëkohësisht me lëshimin e raketave iraniane ndaj Izraelit. Sulmi ndodhi rreth orës 19:00 në rrugën e Jerusalemit, pranë stacionit të hekurudhës Erlich. Dy persona të armatosur hapën zjarr ndaj personave të pranishëm në një prej vagonëve të tramvajit: njëri prej tyre, sipas raportit të autoriteteve, ishte i armatosur me automatik, tjetri me thikë. Si pasojë e sulmit humbën jetën 7 persona dhe u plagosën 10 të tjerë.
Katër prej viktimave nga sulmi terrorist janë identifikuar janë 42-vjeçari Ilya Nozadze, 24-vjeçari Revital Bronstein, 33-vjeçarja Inbar Segev Vigdar dhe 30-vjeçari Shahar Goldman.
Viktima e parë që u identifikua është 33-vjeçarja Inbar Segev, e cila ishte me fëmijën e saj nëntë muajsh, Ari, në momentin e sulmit. Segev u vra nga dy personat e armatosur, por foshnja e saj nuk u lëndua dhe u dërgua në spital nga një kalimtar.
Segev e ka mbrojtur fëmijën e saj me trupin e saj gjatë sulmit. Segev jetonte në Tel Aviv dhe zotëronte një studio fitnesi dhe Pilates në qendër të qytetit. Bashkëshorti i saj, Yaari Vigdar, është një ushtar rezervist, i cili aktualisht po lufton në Gaza dhe në veri, shtoi KAN.
Sipas një oficeri të lartë policie, pamjet nga kamerat e sigurisë në zonë tregojnë se sulmuesit largohen nga një xhami aty pranë dhe sulmojnë kalimtarët në bulevardin e Jerusalemit, duke lënë dy persona në tokë.
Pas kësaj, të paktën njëri prej tyre i hipi tramvajit, duke vrarë katër pasagjerë. Në videot e publikuara në rrjetet sociale, duken dy të rinjtë duke qëlluar edhe disa të shtëna në stacionin e transportit publik pasi kanë zbritur nga treni.
Dy sulmuesit u vranë shpejt dhe u identifikuan. Ata janë dy njëzet vjeçarë nga Hebroni, në Bregun Perëndimor. Në përgjigje të sulmit, ushtria izraelite vendosi një bllokadë në qytetin e lindjes së sulmuesve dhe gjatë një takimi të kabinetit, ministri i Financave Bezalel Smotrich njoftoi se do të bënte thirrje për dëbimin e anëtarëve të familjeve të terroristëve dhe se shtëpitë e tyre do të shkatërrohen.
Një nga sulmuesit u vra nga një rezervist izraelit, Lev Kreitman, i cili i mbijetoi masakrës së Nova Festival të kryer nga Hamasi më 7 tetor. Kreitman shpjegoi se ai ishte ulur afër në bulevardin e Jerusalemit duke pirë një pije kur dëgjoi të shtënat dhe, duke pasur një armë me vete për shkak të statusit të tij si rezervist, vendosi të merrte masa kundër terroristëve.
Forca policore dhe njësia kundër terrorizmit IDF kryen kontrolle në zonë, duke përfshirë një bastisje në xhaminë nga e cila dolën sulmuesit, duke arrestuar disa persona të dyshuar si të përfshirë. Sulmi ndodhi rreth 40 minuta para se sirenat e raketave të aktivizoheshin në Jaffa.
Siç raporton shtypi izraelit, ndërsa alarmet ishin duke rënë, shumë oficerë policie që mbërritën në vendin e sulmit u detyruan të kërkonin strehim në ndërtesat afër dhe të pezullonin kërkimet në zonë. Komisioneri i policisë Danny Levy gjithashtu mbërriti në vendngjarje dhe hyri në një ndërtesë aty pranë dhe vazhdoi të drejtonte oficerët nga brenda derisa u ndalën alarmet.
Nuk ka ende asnjë informacion se si sulmi terrorist ishte i koordinuar me aksionin e Iranit. Autoritetet e Tel Avivit vazhdojnë të hetojnë.
