Një paqeruajtës i OKB-së është qëlluar në Liban, kanë njoftuar forcat e Kombeve të Bashkuara në vend.
Burri, emri i të cilit nuk bëhet i ditur, u “godit me armë zjarri për shkak të aktivitetit të vazhdueshëm ushtarak” në qytetin Naqoura, deklaroi UNIFIL.
Bëhet e ditur se ai u dërgua në spital për t’iu nënshtruar një operacioni për të hequr një plumb dhe tani është në një gjendje stabile, shkruan skynews.
“Ne kujtojmë të gjithë aktorët për detyrimet e tyre për të garantuar sigurinë e personelit dhe ambienteve të OKB-së, duke përfshirë shmangien e aktiviteteve luftarake pranë pozicioneve të UNIFIL”, tha paqeruajtësi i OKB-së.
Incidenti do të thotë se të paktën pesë paqeruajtës të OKB-së janë plagosur në tre ditët e fundit.
Dy nga Sri Lanka u plagosën nga shpërthimet pranë një kulle vëzhgimi në selinë e UNIFIL në qytetin jugor të Libanit, Naqoura.
Ushtria izraelite tha se ushtarët e saj identifikuan një kërcënim dhe u përgjigjën me zjarr, dhe se objektivi i synuar ishte vendosur 50 metra larg.
Zjarri i tankeve izraelite goditi të enjten selinë e UNIFIL-it, duke plagosur dy paqeruajtës indonezianë.
Ndryshe, Franca, Italia dhe Spanja kanë akuzuar Izraelin për shkelje të ligjit ndërkombëtar lidhur me sulmet.
Paqeruajtësit janë vendosur në Libanin jugor për të zbatuar një zonë tampon sipas Rezolutës 1701 të OKB-së që ndihmoi në përfundimin e një lufte të përgjakshme njëmujore midis Izraelit dhe Hezbollahut në vitin 2006.
