Sulmet izraelite në të gjithë Gazën vranë 16 persona të mërkurën, ndërsa forcat izraelite rritën presionin në zonat veriore të enklavës palestineze, rrethuan spitalet dhe strehimoret e refugjatëve dhe urdhëruan banorët të shkonin në jug, thanë mjekët dhe banorët.
Ministria e Shëndetësisë në Gaza dhe Organizata Botërore e Shëndetësisë thanë se nuk do të mund të fillonin një fushatë vaksinimi ndaj poliomielitit në Gazën veriore siç ishte planifikuar për shkak të bombardimeve intensive, zhvendosjeve masive dhe mungesës së aksesit në Gazën veriore.
Forcat izraelite filluan operacionin në veri rreth tre javë më parë me qëllimin e deklaruar për të parandaluar rigrupimin e luftëtarëve të Hamasit, por operacioni u intensifikua pas vrasjes së shefit të Hamasit Yehya Al-Sinwar të mërkurën e kaluar, raporton Reuters.
Ushtria izraelite njoftoi të premten e kaluar se kishte dërguar një njësi tjetër të ushtrisë në Jabalia dhe filloi të rrethonte strehimoret e refugjatëve, duke i detyruar njerëzit e zhvendosur të largoheshin ndërsa kishte grumbulluar shumë nga burrat. Ministria e shëndetësisë tha se të paktën 650 njerëz ishin vrarë që nga fillimi i ofensivës së re.
Mjekët thanë se dy palestinezë u vranë në Beit Lahiya, ndërsa një sulm ajror vrau 12 të tjerë në qytetin e Gazës, duke përfshirë katër punonjës të komunës, në dy sulme të veçanta të mërkurën.
Dy palestinezë të tjerë u vranë në një sulm ajror në Deir Al-Balah në Rripin qendror të Gazës, thanë ata.
Zyrtarët e shëndetësisë dhe të emergjencës civile thanë se dhjetëra trupa palestinezësh të vrarë nga zjarri izraelit në dhe rreth Jabalia ishin shpërndarë në anë të rrugëve dhe nën rrënojat ku ekipet mjekësore nuk mund t’i arrinin.
