Palestinezët në Gaza kanë thënë se kanë fjetur të qetë për herë të parë në më shumë se një vit, pa frikën se do të bombardohen, pas fillimit të një armëpushimi midis Izraelit dhe Hamasit.
Marrëveshja, e cila hyri në fuqi të dielën, solli pauzën e parë në luftime që nga nëntori 2023, kur një marrëveshje njëjavore midis dy palëve lejoi një shkëmbim pengjesh, shkruajnë mediat e huaja.
Qiejt mbi Gazën dhe Izraelin ishin të heshtur gjatë natës, pasi shumë palestinezë të zhvendosur filluan të kthehen në atë që kishte mbetur nga shtëpitë e tyre.
Ata filluan të kontrollonin të afërmit e lënë pas dhe, në shumë raste, të varrosnin të vdekurit e tyre.
Ushtria izraelite pushtoi Gazën pasi Hamasi vrau rreth 1200 njerëz dhe rrëmbeu 251 të tjerë në jug të Izraelit më 7 tetor 2023, në sulmin më vdekjeprurës ndonjëherë kundër shtetit hebre.
Që atëherë, më shumë se 46,000 palestinezë janë vrarë, shumica prej tyre civilë, sipas Ministrisë së Shëndetësisë të Gazës.
Dhe rreth 1.9 milion nga 2.2 milionë banorët e Gazës janë zhvendosur.
Pas 15 muajsh lufte shkatërruese, “dje, nuk kishte avionë luftarakë apo asgjë, kështu që ne fjetëm rehat”, ka thënë Maisara Abu-Qoush, një palestineze e zhvendosur nga Rafah, një qytet në Gazën jugore.
Ndërkohë shumë njerëz u panë duke u kthyer nga Khan Younis në Rafah, vetëm për të gjetur shkatërrim masiv.
Njerëzit ecnin nëpër rrënojat, disa në këmbë dhe të tjerë duke transportuar gjërat e tyre me karroca gomari.
