Pesë punëtorë tajlandez fermash të liruar nga Hamasi në Gaza muajin e kaluar, kanë mbërritur në shtëpi në Bangkok, pasi kaluan gati 500 ditë në robëri.
Pongsak Thaenna, Sathian Suwannakham, Watchara Sriaoun, Bannawat Saethao dhe Surasak Lamnao, kishin punuar të gjithë në Izraelin jugor kur u rrëmbyen gjatë sulmeve nga Hamasi më 7 tetor 2023, transmeton Telegrafi.
Kishte skena emocionuese të dielën në mëngjes, ndërsa pesë burrat u përqafuan nga të afërmit e përlotur në sallën e mbërritjeve të aeroportit të Bangkokut, Suvarnabhumi.
“Nuk di si ta përshkruaj me fjalë”, tha pengu i liruar, Pongsak.
“Do të doja të falënderoja të gjithë zyrtarët që u përfshinë për të na ndihmuar derisa të qëndrojmë këtu. Ne nuk do të ishim këtu pa na ndihmuar ju. Jemi shumë të prekur dhe shumë të lumtur që jemi kthyer në atdheun tonë. Unë jam vërtet mirënjohës”, shtoi ai.
Ministri i Jashtëm, Maris Sangiampongsa tha se ishte “shumë frymëzuese të dëshmosh kthimin e tyre pas lirimit të tyre më 30 janar”.
Somboon Saethao, babai i Bannawat, tha se ishte “shumë i lumtur” dhe se familja e tij do ta mirëpriste djalin e tij në shtëpi me një ceremoni tradicionale tajlandeze.
“Unë nuk mendoj se dua që ai të jetë përsëri larg shtëpisë”, i tha babai i tij AFP-së.
“Bannawat u zhvendos në Izrael nëntë muaj para rrëmbimit të tij, në kërkim të një të ardhure më të mirë për familjen”, shtoi ai.
Gruaja e tij, Wiayada Saethao, u tha gazetarëve të BBC, se 15 muajt që burri i saj u mbajt peng ishin një periudhë vuajtjeje.
“Mos kini frikë më. Ne jemi në shtëpi tani. Ne jemi në Tajlandë. Ne do të kthehemi në shtëpi”, tha ajo.
