Të paktën 13 anëtarë të forcave siriane të sigurisë u vranë sot në përleshjet me militantët e lidhur me regjimin e rrëzuar të ish-presidentit Bashar al-Assad në rajonin Jableh në pjesën veriperëndimore të vendit, njoftoi televizioni sirian.
Televizioni sirian, i cili është i lidhur me administratën e re, raportoi se përleshjet po vazhdonin në rajonin Jableh, pjesë e zonës bregdetare që përbën zemrën e sektit pakicë alavit të cilit i përket familja Assad, raportoi Reuters.
Rajoni bregdetar është një nga sfidat kryesore të sigurisë për presidentin e përkohshëm Ahmed al-Shara pasi qeveria e tij punon për të konsoliduar kontrollin e vendit, tha agjencia.
Agjencia shtetërore siriane e lajmeve SANA, duke cituar një burim në Ministrinë e Mbrojtjes, tha se “mbetjet e milicive të Asadit” po sulmonin disa zona në mënyrë të koordinuar.
Përforcime janë rrugës për në zonën e Jableh për të mbështetur forcat e sigurisë, thuhet në deklaratë.
Në fillim të kësaj jave, dy anëtarë të Ministrisë së Mbrojtjes u vranë në qytetin e Latakisë nga grupe të identifikuara nga media shtetërore si mbetje të milicisë së Asadit.
