Një grup separatist nga Ushtria Çlirimtare e Balochistanit hapi zjarr mbi një tren pasagjerësh në Balochistan, provincën jugperëndimore të Pakistanit, duke e detyruar autokolonën të ndalonte. Sipas raportimeve, separatistët pretendojnë se kanë vrarë 20 ushtarë dhe kanë marrë peng 182 persona.
Treni Jaffar Express, i cili po udhëtonte nga Peshawar në Quetta, u sulmua gjatë rrugës. Forcat ushtarake ndërhynë menjëherë, por u zmbrapsën nga separatistët, të cilët lëshuan një paralajmërim të ashpër: “Nëse sulmet ajrore nuk ndalen, ne do të fillojmë me vrasjen e pengjeve brenda orëve të ardhshme,” deklaroi zëdhënësi i grupit, Jeeyand Baloch.
Sipas separatistëve, pengjet përfshijnë ushtarë aktivë të ushtrisë pakistaneze, polic, ekspertë të inteligjencës dhe forcat kundër terrorizmit, të gjithë në leje.
Ndërkohë, gratë, fëmijët dhe të moshuarit janë liruar pa lëndime.
Detajet e sulmit
Sulmuesit hodhën në erë një linjë hekurudhore përpara se të hapnin zjarr mbi trenin. Drejtuesi i trenit u plagos, ndërsa rojet e sigurisë në bord u përpoqën të kundërpërgjigjen me zjarr.
Kush është Ushtria Çlirimtare e Balochistanit?
Ushtria Çlirimtare e Balochistanit (BLA) është një grup separatist që prej vitesh zhvillon një kryengritje të dhunshme kundër shtetit pakistanez, duke kërkuar pavarësinë e Balochistanit.
Trenat në këtë rajon shpesh mbajnë personel sigurie, pasi BLA ka kryer sulme të shumta mbi hekurudhat dhe forcat ushtarake.
Në nëntor të vitit të kaluar, ky grup kreu një sulm vetëvrasës në një stacion hekurudhor në Quetta, duke vrarë 26 persona, mes tyre forca sigurie, staf hekurudhor dhe pasagjerë.
Ky sulm është një tjetër përshkallëzim i dhunës në rajon dhe pritet të sjellë një reagim të fortë nga autoritetet pakistaneze. Operacionet e sigurisë janë duke u intensifikuar, ndërsa fati i pengjeve mbetet i pasigurt.
