Janë luajtur ndeshjet e javës së 15-të dhe të fundit të sezonit të rregullt në Superligën e basketbollit për meshkuj. Goga Basket, Teuta, Vllaznia e Tirana kanë siguruar një biletë për në gjysmëfinalet play off.
Teuta, ashtu sikurse pat bërë në finale e Kupës së Shqipërisë, fitoi sërish ndaj Goga Basket, këtë herë me shifrat 81-80. Sukses në sekondat e fundit për Teutën, që i shkaktoi rivalëve të Goga humbjen e dytë radhazi në kampionat. Një ndeshje me rivalitet dhe emocione deri në fund, ku të dyja skuadrat dueluan fort për fitore.
Fiton edhe Vllaznia, që mposhti me lehtësi 126-72 Eagles Basket në Shkodër, duke qenë forca e tretë në kampionat. Eagles, sezonin tjetër do të luajë në Kategorinë e Parë. Ndërsa Tirana mundi 88-84 Partizanin në derbin kryeqytetas, ndeshje e ekuilibruar deri në fund. Dy ekipet duelonin për vendin e katërt, që tashmë i takon bardhebluve.
Basketboll – Superliga Meshkuj, java e 15-të
Goga Basket – Teuta, 80-81
Vllaznia – Eagles Basket, 126-72
Tirana – Partizani, 88-84
Renditja: Goga Basket 28 pikë, Teuta 27 pikë, Vllaznia 25 pikë, Tirana 21 pikë, Partizani 19 pikë, Eagles Basket 15 pikë.
