Vëllaznimi ishte në epërsi pas çerekut të parë, pas çerekut të dytë, e pas çerekut të tretë. Por jo edhe atëherë kur vërtetë vlen – në fund të ndeshjes.
Skuadra gjakovare u mposht të premten mbrëma nga Sigal Prishtina me rezultat 85:77, ndonëse e kontrolloi ndeshjen në shumicën e kohës.
Ndeshja i takoi xhiros së 21-të të Superligës së Kosovës në basketboll. U zhvillua në Pallatin e Rinisë në Prishtinë në praninë e dhjetëra shikuesve.
Për Prishtinën është fitorja e shtatë rresht në Superligë. Humbjen e fundit kampionale ia kishte shkaktuar pikërisht Vëllaznimi, në Gjakovë, në kuadër të xhiros së 14-të. Pra skuadra prishtinase është në seri të fitoreve ndaj të gjitha skuadrave të Superligës.
Prishtina tani i ka 34 pikë sa edhe Trepça e Bashkimi që kanë një ndeshje më pak të zhvilluar. Vëllaznimi është i katërti me 32 pikë.
Skuadra gjakovare e fitoi çerekun e parë me rezultat 23:16. Në çerekun e dytë të dy skuadrat i shënuan nga 19 pikë dhe kështu Vëllaznimi mbajti epërsinë. Prishtina u afrua në çerekun e tretë, të cilin e fitoi 23:21. Pas 30 minutave lojë rezultati ishte 63:58 në të mirë të Vëllaznimit.
Mysafirët mbajtën epërsi deri në mesin e periudhës së katërt. 4.16 minuta par fundit rezultati u barazua në 69:69. Sërish Vëllaznimi shënoi për tri pikë, ndërsa Prishtina barazoi në 72:72. Më pas Prishtina shënoi shumë më tepër për të arkëtuar dy pikë të vlefshme.
Josh Nzeakor ishte më efikasi te Prishtina me 17 pikë. Rashad Mahalbashiq i kishte 16 pikë e 10 kërcime. Me 14 pikë, shtatë kërcime e shtatë asistime kontribuoi Daniel Lekndreaj.
Jericole Hellems i kishte 19 pikë e pesë kërcime te Vëllaznimi. 17 pikë e pesë kërcime i realizoi Trey Anderson, ndërsa Jason Jitoboh i kishte 10 pikë e nëntë kërcime.
