Kombëtarja e Shqipërisë në basketboll për meshkuj u mund 91-70 nga Armenia, në ndeshjen e vlefshme për fazën para-eliminatore të Botërorit 2027.
Ndeshja e luajtur në mjediset e “Akademisë Goga” në Durrës, në përgjithësi u dominua nga miqtë.
Pas një periode të parë të ekuilibruar, armenët u shkëputën në çerekun e dytë, duke administruar gjithçka me kujdes deri në fund.
Kjo është humbja e tretë e kombëtares kuqezi në këtë event. Kuqezinjtë e drejtuar nga Erkand Karaj, mbyllin renditjen në Grupin C (Shqipëria i ka humbur edhe dy sfidat e para: 63-99 ndaj Austrisë dhe 79-84 ndaj Armenisë) pa asnjë fitore.
Perioda e parë mbyllet 22-17 për miqtë, që në 10-minutëshin e dytë shkëputen 47-33. Asgjë nuk ndryshon në 20 minutat e dyta, me armenët që arrijnë të administrojnë me qetësi avantazhin, falë gjuajtjeve të sakta për tri pikë të Jones (realizoi 7 të tilla, 34 pikë në total).
Për Shqipërinë mungoi lojtari lider, me Lekndreaj që realizoi 17 pikë, mbështetur edhe nga Dusha me 15 e Tola me 16 pikë, por që nuk mjaftuan. Krejt takimi mbyllet 91-70 për Armeninë, ndërkohë që në fundjavë Shqipëria do të luajë ndaj Austrisë.
