Boksieri britanik Tyson Fury ndihet tepër i trishtuar nga infektimi me koronavirus dhe shtyrja e duelit të 24 korrikut me Deontay Wilder.
Lajmin e konfirmoi menaxheri i Fury, Frank Warren, që shtoi se britaniku tani ndjen më shumë presion.
“Fola me Tyson, është shumë i mërzitur, pesimit dhe i zhgënjyer. Mezi e priste këtë sfidë, ndërsa tani i duhet të presë edhe 3 muaj të tjerë e të rinisë përgatitjet nga e para. Ky ishte një lajm që nuk e prisnim”, tha Warren.
Ai shtoi se me shumë gjasa Fury është infektuar nga ndonjë anëtar i stafit, pasi disa të tillë kanë dalë pozitiv me Covid-19. “Tyson është shumë i kujdesshëm, ndaj dhe e ndjen shumë këtë shtyrje. Kjo do ta penalizojë shumë”, tha Warren.
“Tyson e kupton mirë se tani Wilder do të jetë më i inatosur dhe e pret një duel më i fortë. Tani po bisedojmë me stafin e Wilder për një datë të re. Sfida do të zhvillohet në tetor, por ende s’kemi një datë zyrtare”, tha Frank Warren.
