Kanë kaluar më shumë se dy vjet që kur Khabib Nurmagomedov, i pamposhtur në kafaz (29 fitore e asnjë humbje) mbylli karrierën e tij në eventin UFC-254, pas fitores ndaj Justin Gaethje.
Disa herë në këto vite, 34-vjeçari rus ka konfirmuar se nuk do të rikthehet më në kafaz edhe pse për disa kohë bëri detyrën e trajnerit.
Ish-kampioni i peshave të lehta të UFC, Khabib Nurmagomedov, kohët e fundit zbuloi se do të bënte një pushim nga të gjitha sportet luftarake pa dhënë një arsye pse.
Por një ditë më parë, “The Eagle” i emocionoi fansat për të ardhmen e tij, duke shpërndarë në Instagram një video të tij, duke vrapuar në tapet në palestër.
Dhe mesazhi ishte shumë enigmatik: “Në korrik duhet të jem gati (jo MMA)”, thuhej në komentin e Nurmagomedov.
Tifozët mund të spekulojnë se çfarë po lë të kuptohet nga Khabib me rikthimin e tij në stërvitje. I madhi i të gjitha kohërave ka qëndruar besnik në deklaratën për të mos u kthyer më në MMA, siç tregohet nga komenti i tij, por mundësi të tjera kanë qarkulluar gjithmonë rreth tij.
Nurmagomedov dëshironte që përpara se të tërhiqej të zhvillonte një përballje me shokun e tij të madh, ish-kampionin e UFC në peshën e lehtë dhe të mesme, Georges St-Pierre.
Gjithmonë në formë dhe tani i lirë nga kontrata e tij me UFC, St-Pierre ka qëndruar gjithashtu i bindur në idenë se nuk do të kthehet në MMA.
Gjithsesi, një përballje mes tyre do të ishte ideale për fansat.
