Shqipëria merr pjesë në Kampionatin Botëror të Boksit për të Rinj që po zhvillohet në Budva. Midis 12 konkurrentëve kuqezinj është edhe Leo Xhangoli, që stërvitet me klubin e Teutës.
Talenti durrsak ka theksuar për RTSH se do të kthehet nga Botërori me medalje.
Nga e diela ka nisur ne Budva Kampionati Botëror i Boksit për të rinj. Shqipëria merr pjese në këtë veprimtari me 12 boksierë, 11 djem dhe një vajzë.
Për herë të parë në histori një boksier nga Teuta, do të përfaqësojë klubin bregdetar në Botërorin e Boksit për të rinj. Leo Xhangoli, i cili garon në peshën 80 kg, në një intervistë për Rtsh, tregoi për fazën përgatitore dhe pritshmërit në këtë botëror.
“Përgatitja ka shkuar shumë mirë, po stërvitemi dy herë në ditë. Do bëj të pamundurën, shpresoj të bëhem sportisti i parë që sjell medalje në Durrës, ti sjell medalje Teutës. Jam në formë shumë të mirë, kam fituar eksperiencë, kam bërë shumë stërvitje me ekipe të tjera”.
I pyetur se kush e inspiron në sportin e dorezave, Xhangoli u përgjigj: “Majk Tajson më inspiron, më pëlqen jashtë mase, vetëm atë studioj”.
Botërori i boksit për të rinj do të zgjasë deri në 4 nëntor. Në të konkurrojnë 660 vajza e djem nga vende të ndryshme të botës.
