Pas gati 40 ditësh, në Riad të Arabisë Saudite do të zhvillohet revanshi i peshave të rënda në boks mes kampionit të botës, ukrainasit Oleksandr Usyk e britanikut Tyson Fury.
Në prag të kësaj sfide të madhe ka folur për mediat promotori i boksierit ukrainas, që ka zbuluar disa sekrete nga trajnimi i kampionit të botës.
“Do të jetë sërish një sfidë e madhe dhe le të fitojë njeriu më i mirë. Përsëri”, tha Alex Krassyuk.
Më tej, ai shtoi: “Ne kemi të tashmen dhe po mendojmë për të ardhmen.
Është një kënaqësi dhe mrekulli që po organizojmë sërish një sfidë të tillë mes dy boksierëve më të mirë në botë”.
“Mendoj se Usyk do të ketë një stil të ri në këtë revansh. Jam i sigurtë që edhe Tyson do të bëjë të njëjtën gjë, ndaj do të jetë një përballje krejt e re. Jam i sigurtë se do të jetë një sfidë edhe më e bukur se e para, që do të mahnisë botën, pasi ata luftojnë hapur”, tha Krassyuk.
