Vitin 2024 e konsideron si më të suksesshmin në karrierën e saj. Kjo për shkak se ajo mori pjesë në Lojërat Olimpikë në Paris por nuk arrti të fitojë trofe.
Boksierja Donjeta Sadiku thotë se përkundër se nuk arriti të fitojë medalje olimpike, këtë synon ta bëjë në olimpiadën e radhës që mbahet në viti 2028.
Sadiku: Në olimpiadë synova medalje, por nuk shkoi siç planifikova
“Motivi dhe synimi im ka qenë sjellja e një medaljeje olimpike edhe nga boksi mirëpo jo çdoherë shkojnë gjërat ashtu si çdo herë shkojnë gjërat ashtu siç ne planifikojmë dhe dëshirojmë të shkojnë. Mirëpo unë ndihem krenare se çfarë kam arritur të bëj dhe unë jam e re dhe besoj që në olimpiadën tjetër do të kthehemi me medalje olimpike.”, thotë fillimisht Sadiku.
Derisa flet për KosovaPress, Sadiku thotë se për vitin 2025 synimet janë shumë të qarta, së paku një medalje të artë nga Kampionati Botëror i boksit, vendi dhe datat e të cilit nuk janë përcaktuar ende.
Sadiku: Medalja e artë është synimi i vetëm në këtë vit
“Synimet e mia sa i përket vitit 2025 janë krejtësisht të qarta. Do të marr pjesë në shumë turne dhe kampionate dhe synimi im është vetëm medalja e artë.”, thekson Sadiku.
Si një fituese tashmë e dëshmuar, Sadiku është shëndrruar në një model edhe për boksierët më të reja. Në sallën e saj stërvitore mysafire është edhe kampionia shqiptare në boks, Esmeralda Novruzaj e cila tregon arsyen pse ka kërkuar të punojë së bashku me boksieren kosovare.
Novruzaj: Sadiku është ndër sportistet më të mira në botë
“Arsyeja kryesore në fakt ishte se duke qenë se jam duke u përgatitur për Kampionatin Botëror i cili zhvillohet në Serbi e pamë të arsyeshme që duke qenë se në këtë klub ndodhet një nga sportistet më të mira jo vetëm shqiptare po në të gjithë botën, Donjeta Sadiku, është shumë e rëndësishme që të stërvitesh me më të mirët dhe të përgatitemi për Kampionatin Botëror dhe pse jo është një eksperiencë shumë e vyer që mund të mësojë dhe përgatitem më mirë për ndeshjet e ardhshme.”, thotë Novruzaj.
Kurse boksieri premtues Luar Aliu thotë se Donjeta është motivi i tij për të synuar medalje evropiane e botërore në karrierë.
Aliu: Donjeta është motivi ynë për të synuar medalje evropiane e botërore
“Unë jam stërvitur gjatë gjithë jetës me Donjetën, jam sparing partneri i saj andaj për mua është një motiv i madh të stërvitem me Donjetën duke e parë gjithë punë që e bënë ajo dhe duke e parë që i kam të gjitha kushtet e njëjta sikur ajo dhe për ne po shtohet motivi që edhe ne të punojmë drejt medaljeve evropiane dhe botërore.”, thotë Aliu.
Përveç boksierëve nga Shqipëria, trajnerja e Donjeta Sadikut, Marjola Sallauka, ka bërë të ditur se ka interesim edhe nga shtete të tjera që t’i sjellin boksierët e tyre për t’u stërvitur bashkë me Sadikun në Kosovë.
