Bielefeld, Gjermani – Kaos dhe panik në Bielefeld! Të shtëna me armë zjarri u dëgjuan para Gjykatës së Landit, duke shkaktuar plagosjen e disa personave. Policia dhe forcat speciale (SEK) ndërhynë menjëherë në vendngjarje.
Sipas dëshmitarëve okularë, disa persona mbetën të shtrirë në tokë të plagosur, ndërsa njëri prej tyre u reanimua nga ekipet e ndihmës së shpejtë. Në mesin e të plagosurve janë anëtarë të familjes së të pandehurit.
Ky incident ndodhi gjatë procesit gjyqësor për vrasjen e Besar Nimanit (38), boksier shqiptar dhe ish-kampion i Europës, i cili u ekzekutua në rrugë të hapur në Bielefeld më 9 mars të vitit të kaluar. Në bankën e të akuzuarve ishte Hüseyin Akkurt (38), i arrestuar në korrik në Bruksel. Ndërkohë, bashkëpunëtori i tij i dyshuar, Ayman Dawoud Kirit (33), është ende në arrati.
Të shtëna pas gjyqit – i plagosur vëllai dhe babai i të akuzuarit
Rreth orës 13:30, menjëherë pas përfundimit të seancës gjyqësore, shpërthyen të shtëna rreth 150 metra larg daljes së gjykatës. Dëshmitarët tregojnë se rojet gjyqësore filluan të bërtisnin: "Po gjuan dikush jashtë!".
Një nga të plagosurit është vëllai i të akuzuarit, i cili u qëllua në këmbë. Pamjet filmike tregojnë se ai u përpoq të largohej duke çaluar, por ndaj tij u qëllua sërish. Babai i të akuzuarit gjithashtu është plagosur rëndë, dyshohet se është qëlluar në zemër dhe ndodhet në gjendje kritike për jetën.
Autori në arrati – shkolla në alarm
Një nga autorët u arrestua menjëherë, ndërsa personi i dytë dyshohet se është strehuar në një ndërtesë pranë gjykatës. Për këtë arsye, një shkollë pranë zonës shpalli alarm për sulm të armatosur (Amokalarm), duke detyruar nxënësit dhe mësuesit të fshiheshin në klasa për siguri.
Ekzekutimi i Besar Nimanit – 16 plumba për një hakmarrje
Sipas aktakuzës, më 9 mars 2023, Besar Nimani u ndoq nga të pandehurit teksa parkonte BMW X5 në një zonë të ndaluar në qendër të Bielefeldit. Sapo doli nga makina për të hyrë në një kafene, dy personat e dyshuar hapën zjarr duke lëshuar të paktën 16 plumba ndaj tij.
Hetuesit dyshojnë se vrasja ka ndodhur për hakmarrje në botën e krimit, megjithëse ende nuk është sqaruar motivi i saktë i ekzekutimit të ish-kampionit shqiptar.
Policia gjermane vazhdon kërkimet për personin e dytë të dyshuar dhe po heton nëse përplasja e sotme është e lidhur me vrasjen e Nimanit.
