Selena Gomez u pa për herë të parë në publik pas shpalljes së fejesës së saj me producentin Benny Blanco.
Aktorja dhe këngëtarja 32-vjeçare mori pjesë në një event në teatrin ‘Harmony Gold’ në Los Angeles të shtunën, duke tërhequr vëmendjen me paraqitjen e saj elegante, por pa unazën e fejesës.
Vetëm pak ditë më parë, Selena zbuloi në Instagram se Blanco i kishte propozuar martesë me një unazë diamanti 8 karatësh të prerë në formë markeze, gjatë një pikniku romantik, shkruan DailyMail.
Në fotografitë e ndara nga momenti i veçantë, Selena shfaqi vetëm dorën e saj të majtë për të treguar unazën që sipas ekspertëve vlen mbi 1 milion dollar (952,199 euro).
Në daljen e saj të fundit, Selena zgjodhi një pamje klasike me një fund kadife të zi, një bluzë të bardhë dhe një pallto të gjatë të zezë.
Flokët kaçurrelë dhe një grim elegant, që përfshinte buzë të kuqe të theksuara, plotësuan ansamblin e saj.
Gjatë piknikut të fejesës, i dokumentuar në Instagram, aktorja shfaqej e lumtur, me një shportë pikniku dhe një kuti Taco Bell pranë, ndërsa Benny i dhuronte një puthje të dashur.
Unaza, e përshkruar nga argjendarja Laura Taylor si “një dizajn i përjetshëm dhe luksoz”, shfaqi një diamant të madh markez dhe një shirit me diamante të vegjël.
Fejesa e tyre shënon një moment të veçantë për Selenën, duke i bërë jehonë këngës së saj të vitit 2015, ‘Good For You’, ku ajo përmend diamante markeze. Fansat presin me padurim çfarë do të vijë nga çifti pas këtij lajmi emocionues.
