Këshilli i Sigurimit i OKB-së miratoi një rezolutë sonte duke u bërë thirrje talibanëve të sigurojnë largimin e sigurt të atyre që duan të largohen nga Afganistani, por propozimi i Francës për krijimin e një zone mbrojtëse në Kabul nuk u miratua.
Gjithsej 13 nga 15 anëtarët e Këshillit të Sigurimit të OKB -së votuan për tekstin e rezolutës së hartuar nga Shtetet e Bashkuara, Franca dhe Britania e Madhe. Kina dhe Rusia abstenuan.
Rezoluta thotë se talibanët "pritet" të respektojnë të gjitha "detyrimet" e tyre, veçanërisht në lidhje me "largimin e sigurt" të afganëve dhe të huajve nga vendi, pas tërheqjes përfundimtare të forcave amerikane.
Teksti nuk përmend propozimin për të formuar një zonë mbrojtëse në Kabul, e cila u diskutua nga presidenti francez Emmanuel Macron. Ai kohët e fundit tha se një zonë e tillë do të mundësonte vazhdimin e operacioneve humanitare në Afganistan.
Një diplomat pa emër në OKB tha se rezoluta "nuk është funksionale, por i referohet parimeve, mesazheve kryesore politike dhe paralajmërimeve".
Rezoluta këmbëngul në rëndësinë e respektimit të të drejtave të njeriut, përfshirë të drejtat e grave, fëmijëve dhe pakicave, dhe inkurajon "krijimin e një zgjidhjeje përfshirëse politike me pjesëmarrjen e grave".
Teksti gjithashtu bën thirrje që "territori afgan të mos përdoret për kërcënime ose sulme ndaj vendeve të tjera, as për një strehë për terroristët".
