Pas një takimi virtual me Presidentin e SHBA-së, Joe Biden, dhe aleatët kryesorë, Sekretari i Përgjithshëm i Organizatës së Traktatit të Atlantikut të Veriut, Jens Stoltenberg tha se “rreziku i konfliktit në Evropë është real” në një deklaratë.
“Pjesëmarrësit e bënë të qartë se çdo agresion i mëtejshëm rus kundër Ukrainës do të ketë një kosto të lartë, teksa përsëritën se ata ishin të gatshëm të vazhdonin dialogun me Rusinë”, thuhet në deklaratën e NATO-s.
Biden organizoi një bisedë për situatën midis Rusisë dhe Ukrainës të premten në mëngjes me kryeministrin kanadez Justin Trudeau, kryeministrin e Mbretërisë së Bashkuar Boris Johnson, liderët e NATO-s dhe BE-së.
Në një deklaratë të Komisionit Evropian, grupi nënvizoi mbështetjen e tij për Ukrainën dhe miratimin përfundimtar të një pakete ndihme financiare urgjente prej 1.2 miliardë eurosh.
Sipas deklaratës së NATO-s, Stoltenberg ka ftuar Rusinë dhe të gjithë anëtarët e tjerë të Këshillit NATO-Rusi në takime të mëtejshme për të diskutuar sigurinë evropiane.
