“Vazhdimi i gjuajtjes ruse mbi objektet bërthamore në Ukrainë është i pamatur dhe duhet të ndalet”, tha Sekretarja e Energjisë e SHBA-së, Jennifer Granholm, në një postim të ri në Twitter.
“Monitoruesit e rrezatimit në Ukrainë janë kryesisht ende duke funksionuar”, shtoi Granholm, e cila mbikëqyr arsenalin bërthamor të SHBA-së, shkruan BBC, transmeton "Bota sot".
Ajo tha se SHBA nuk mund të konfirmojë pretendimet ruse se energjia është rikthyer në Çernobil, por thotë se ukrainasit i kanë thënë SHBA-së se një pjesë e karburantit dizel është dërguar atje për të fuqizuar gjeneratorët rezervë në vendin e fatkeqësisë bërthamore të vitit 1986.
"Rivendosja e energjisë elektrike nga jashtë në Çernobil është një hap i rëndësishëm sigurie dhe Rusia duhet të veprojë shpejt për të lejuar rivendosjen e energjisë," tha ajo, duke shtuar se dëmtimi i një objekti bërthamor në Kharkiv nuk ka çuar në ndonjë rrezik të rëndësishëm sigurie.
"Dhe ne mbetemi të shqetësuar se stafi në Çernobil dhe Zaporizhzhia po operojnë nën presion dhe pa pushim të duhur, gjë që është një rrezik sigurie," shtoi ajo.
"Përfundimi: Shkelja nga Rusia e parimeve bazë të sigurisë bërthamore është e papranueshme dhe sulmet që rrezikojnë sigurinë në Ukrainë dhe më gjerë duhet të ndalen."
