Vladimir Putin mund të jetë duke u fshehur, sipas provave të reja që sugjerojnë se lideri rus po qëndron në një bunker bërthamor top-sekret në lindje të Moskës.
Sipas 'provave' të reja, Vladimir Putin dhe komanda e tij e lartë janë të vendosur në bunkerë bërthamorë të fshehtë, ndërsa lufta e përgjakshme po vazhdon në Ukrainë.
Lëvizjet e avionëve të përdorur nga zyrtarë të lartë të Kremlinit, tregojnë se Putin mund të jetë duke kaluar një pjesë ose të gjithë kohën e tij në strehën pranë Surgut në Siberinë perëndimore, shkruan mirror.co.uk, përcjellë “Bota sot”.
Ministri i tij i mbrojtjes, Sergei Shoigu besohet të jetë në një bunker pranë Ufa në Urale, 725 milje në lindje të Moskës, tha gazetari investigativ, Christo Grozev.
Shoigu ka munguar në mënyrë misterioze prej disa javësh duke ndezur thashethemet për shëndetin e tij.
Teoria e vendndodhjes së tij mbështetet nga vajza e tij Ksenia Shoigu, 31 vjeçe, e cila u fotografua në Ufa më 22 mars.
Zonja Shoigu vizitoi qytetin rus pasi spekulimet ishin përhapur se ministri i mbrojtjes kishte vuajtur probleme me zemrën.
Ajo gjithashtu ndaloi papritur aksesin e publikut në Instagramin e saj, ku kishte pozuar me fëmijën e saj në ngjyrat blu dhe verdhë të Ukrainës.
Përdorimi i bunkerëve të sigurisë së lartë, nëse konfirmohet, është alarmues dhe sugjeron se Putini mund të jetë duke u përgatitur për të vendosur armë bërthamore dhe një lëvizje që do të çonte në hakmarrje të pashmangshme.
Grozev, i cili ka lidhje me gazetën hetimore britanike Bellingcat, tha: “Jam absolutisht i sigurt që Shoigu është në një bunker. Duke ndjekur lëvizjen e avionit të tij, shohim fluturime shumë të shpeshta për në Ufa. Duke ditur se në këtë rajon ka edhe bunkerë të mbrojtur, kjo jep një përgjigje të qartë për vendbanimin e tij”.
Në një intervistë për kanalin Ukraine-24, ai i tha spikerit të TV Yevgeny Kiselyov: "Ky është versioni ynë shumë i justifikuar. Unë besoj në të dhe e konsideroj një përfundim thjesht analitik. Nuk mund të ketë asnjë përfundim tjetër. Nëse strategjia e luftës e Kremlinit supozon një sulm bërthamor – dhe e bën – siç tha vetë [Dmitry] Peskov [zëdhënësi i Putinit] në CNN disa ditë më parë, atëherë nuk mund të ketë asnjë version tjetër”.
“Nëse ka një vendim për një sulm të mundshëm bërthamor, ata nuk mund ta fshehin më pas udhëheqjen ushtarake. Ato duhet të fshihen paraprakisht. Jam absolutisht i sigurt se ai është në një të ashtuquajtur bunker dhe duke ndjekur avionin që ai zakonisht fluturon, ne shohim fluturime shumë të shpeshta, pothuajse të përditshme për në Ufa. Duke ditur se ky rajon ka ata bunkerë shumë të mbrojtur, kjo na çon në përfundimin e qartë”, u shpreh Grozev.
Ai beson se Putin ka një bunker diku tjetër, nga ai në Ufa.
“Me shumë mundësi ai është diku tjetër, sepse ne po shohim fluturime të tjera dhe janë më të klasifikuara se fluturimi që shkon në Ufa. Këta janë avionë shtetërorë dhe ata i fikin transponderët e tyre diku rreth Surgut”.
Ky është kryeqyteti i naftës i Rusisë dhe është rreth 1800 milje në verilindje të Moskës.
“Duket sikur faza përfundimtare është mjaft e fshehtë dhe ka shumë të ngjarë që atje të ketë një bunker më elitar, me elitën e qeverisë”.
Më parë ka pasur pretendime se Putini kishte zhvendosur të afërmit e tij të ngushtë në një bunker në malet Altai, rreth 1,100 milje në juglindje të Surgut dhe 2,360 milje në lindje të Moskës.
Grozev gjithashtu sugjeroi se shefi i Shtabit të Përgjithshëm të Forcave të Armatosura të Rusisë, Valery Gerasimov, po vepron nga një bunker.
Rastësisht, vajza e ministrit të mbrojtjes Ksenia Shoigu duket se ka qenë në Ufa mes 22 dhe 25 marsit.
“Sot jemi në Ufa, për një vizitë pune”, postoi ajo në kanalin e saj Telegram më 22 mars./Bota sot
