Zëvendëskryeministrja e Ukrainës Iryna Vereshchuk u ka thënë gazetarëve në Zaporizhzhia se një kolonë prej 106 personash të evakuuar nga uzina Azovstal në Mariupol pritet të arrijë të martën vonë.
Por ajo tha se qindra të tjerë që përpiqeshin të largoheshin nga Mariupol dhe zona të tjera të pushtuara nga Rusia po pengoheshin ta bënin këtë nga forcat ruse.
Vereshchuk tha se armëpushimi rreth Azovstal nuk kishte zgjatur mjaftueshëm për të nxjerrë të gjithë civilët, "kështu që qindra gra, fëmijë dhe të moshuar janë nën rrënoja".
Ajo tha se kishte gjithashtu 40 ushtarë të plagosur rëndë të bllokuar në uzinë që kishin nevojë urgjente për kujdes mjekësor. Nga 150 personat që kishin mundur të largoheshin nga kompleksi i rrënuar, tha ajo, 106 ishin dërguar në Zaporizhzhia.
Vereshchuk akuzoi rusët për ndryshimin e marrëveshjeve rreth evakuimeve, që do të thoshte se njerëzit nga qytetet e pushtuara si Tokmak dhe Vasylivka, të cilat janë në jug të Zaporizhzhia, nuk mund të largoheshin.
Evakuimi nga Azovstal u ndërmjetësua dhe u organizua nga Kombet e Bashkuara dhe Kryqi i Kuq Ndërkombëtar.
"Është një lehtësim i jashtëzakonshëm që disa civilë që kanë vuajtur për javë të tëra tani janë jashtë," tha të martën Presidenti i Komitetit Ndërkombëtar të Kryqit të Kuq Peter Maurer.
“KNKK nuk i ka harruar njerëzit që janë ende atje, as ata në zona të tjera të prekura nga armiqësitë apo ata që kanë nevojë urgjente për ndihmë humanitare, kudo që janë. Ne nuk do të kursejmë asnjë përpjekje për t'i arritur ato”, shtoi ai.
