Kur Ukraina shënjestroi me sukses luftanijen e çmuar të Rusisë muajin e kaluar me raketa lundrimi kundër anijeve, ata patën një ndihmë nga Shtetet e Bashkuara.
Forcat ukrainase, pasi kishin pikasur një luftanije ruse në Detin e Zi, thirrën kontaktet e tyre amerikane për të konfirmuar se ishte në fakt Moskva, thanë burime të njohura me ngjarjet për CNN, përcjell “Bota sot”.
Shtetet e Bashkuara u përgjigjën se ishte, dhe dhanë informacione për vendndodhjen e saj.
Nuk është e qartë nëse SHBA e dinte se Ukraina do të lëvizte për të goditur anijen.
Anija u mbyt pasi u godit nga dy raketa ukrainase më 14 prill, duke i dhënë një goditje të madhe ushtrisë ruse.
Shtetet e Bashkuara për muaj të tërë u kanë ofruar forcave ukrainase informacione për lëvizjet e trupave ruse brenda Ukrainës, duke përfshirë komunikimet e përgjuara rreth planifikimit ushtarak rus.
