Udhëheqësi çeçen, i mbështetur nga Kremlini, ka postuar një video në të cilën ai paralajmëron se Polonia mund të jetë “e radhës” pas Ukrainës.
Sipas mediave të huaja, Ramzan Kadyrov, i cili është i famshëm për “deklaratat agresive” të tij, ka thënë se Ukraina ishte “një gjë e përfunduar” dhe se “nëse jepet një urdhër pas Ukrainës, ne do t’ju tregojmë (Polonisë) se çfarë mund të ndodhë në gjashtë sekonda”.
Ndryshe, Polonia, e cila kufizohet me Ukrainën, i ka ofruar fqinjit të saj armë dhe ndihma të tjera që kur Rusia filloi agresionin mbi Ukrainë më 24 shkurt.
Ajo gjithashtu ka mirëpritur miliona refugjatë ukrainas.
Kadyrov më vonë i kërkoi presidentit ukrainas Volodymyr Zelenskyy që “më në fund të vijë në vete dhe të pranojë kushtet e ofruara nga presidenti ynë (Vladimir Putin)”.
Kadyrov ka përdorur vazhdimisht mediat sociale për t’u mburrur për performancën e pretenduar të luftëtarëve çeçenë kundër trupave ukrainase dhe për të bërë deklarata të tjera të pakonfirmuara në lidhje me luftën në Ukrainë.
