LIVE: Ukrainasit nuk dorëzohen përballë terrorit rus/ Obama vjen me një mesazh për Putinin – e paralajmëron për këtë gjë!

Pakësimi i rezerva ushqimore për shkak të bllokimit të eksporteve të drithërave dhe produkteve të tjera ushqimore nga Ukraina dhe Rusia mund të bëjë që 11 milionë deri në 19 milionë njerëz të vuajnë nga uria kronike gjatë vitit të ardhshëm, tha agjencia për ushqim e Kombeve të Bashkuara.

Pushtimi rus i Ukrainës ka rritur çmimet e drithërave, vajrave ushqimor, karburanteve dhe plehrave. Rusia dhe Ukraina janë eksportuese të mëdha të grurit, pasi këto dy shtete përbëjnë një të tretën e furnizimeve botërore me grurë.

Rusia po ashtu është një prej eksportueseve më të mëdha të plehrave, ndërkaq Ukraina eksporton grurë dhe vaj luledielli.

Ndikimi i luftës “mund të çojë që 11 deri në 19 milionë njerëz të preken nga uria, nga uria kronike më 2023”, tha më 10 qershor, Boubaker Ben Belhassen nga Organizata për Ushqim dhe Agrikulturë.

Këto vlerësime bazohen në uljen e eksporteve të produkteve ushqimore nga Ukraina dhe Rusia.

“Shtetet që po preken më së shumti janë në rajonin e Afrikës së Veriut dhe Jugut, duke pasur parasysh varësinë e tyre të madhe ndaj importeve, veçmas të grurit, por edhe të vajrave ushqimore”, tha ai.

Ai shtoi se edhe shtete të tjera, përfshirë në Afrikë dhe Azi, sikurse Bangladeshi dhe Indonezia, po preken jashtëzakonisht nga bllokadat në eksportet ukrainase.

Portet ukrainase në Detin e Zi janë bllokuar nga trupat ruse, të cilat kanë nisur pushtimin e Ukrainës më 24 shkurt, duke rritur shqetësimet për një krizë globale ushqimore.

Presidenti rus Vladimir Putin e krahasoi luftën kundër Ukrainës me pushtimet e shekullit të 18-të, të Pjetrit të Madh të Rusisë

Në komentet e lëshuara në televizionet ruse me rastin e 350-vjetorit të lindjes së Pjetrit të Madh, presidenti rus Vladimir Putin e krahasoi veten me Carin duke tërhequr një paralele midis atyre që ai i përshkroi si dy sipërmarrjet e tyre historike binjake për të rimarrë tokat ruse.

Putin foli për nevojën e vendit të tij për të "marrë përsëri" territorin dhe "mbrojtur veten" pasi vizitoi një ekspozitë në Moskë kushtuar carit dhe tërhoqi paralele midis themelimit të Shën Petersburgut nga Pjetri i Madh në vitin 1703 dhe ambicieve të Rusisë moderne.

Kur Pjetri themeloi kryeqytetin e ri, “asnjë vend evropian nuk e njohu atë si Rusi. Të gjithë e njohën atë si Suedi”, tha Putin. “Çfarë po bënte (Pjetri)? Morri mbrapsht dhe përforcoi. Kjo është ajo që ai bëri. Dhe me sa duket edhe ne gjithashtu kemi detyrën të marrim mbrapsht dhe të përforcohemi”.

Në komentet televizive në ditën e 106-të të luftës së tij në Ukrainë, ai shtoi: "Nëse shkojmë nga fakti se këto vlera themelore përbëjnë bazën e ekzistencës sonë, sigurisht që do të kemi sukses në zgjidhjen e detyrave me të cilat përballemi".

Putin gjithashtu duket se mbështet zgjerimin e mëtejshëm territorial të Rusisë, duke thënë se është “e pamundur të ndërtohet një gardh rreth një vendi si Rusia. Dhe ne nuk kemi ndërmend ta ndërtojmë atë gardh”.

Një këshilltar i lartë i presidentit ukrainas Volodymyr Zelenskiy hodhi poshtë komentet dhe atë që ai e quajti çdo përpjekje për të legalizuar vjedhjen e tokës.

"Perëndimi duhet të tërheqë një vijë të qartë të kuqe në mënyrë që Kremlini të kuptojë çmimin e çdo hapi të ardhshëm të përgjakshëm... Ne do të çlirojmë territoret tona," tha Mykhailo Podolyak.

Putini ka kërkuar të justifikojë pushtimin rus të Ukrainës duke pohuar se Ukraina nuk ka identitet të vërtetë kombëtar ose traditë të shtetësisë, ndërsa Moska thotë se ka vepruar për të çarmatosur dhe "denazifikuar" Ukrainën.

Në korrik 2021, Kremlini botoi një ese të gjatë nga Putin, në të cilën ai argumentonte se Rusia dhe Ukraina ishin një komb, i ndarë artificialisht./REL

Parlamenti i Bashkimit Evropian mbështet përpjekjen e Ukrainës për të arritur statusin e kandidatit për t'u bashkuar me Bashkimin Evropian, tha presidentja e parlamentit Roberta Metsola të premten në Samitin e Demokracisë në Kopenhagë.

"Parlamenti i BE-së qëndron fort pas kërkesës së Ukrainës për të marrë statusin e kandidatit në BE," tha Metsola.

Pas shqyrtimit të dy pjesëve të pyetësorit të dorëzuar nga Kievi në Bruksel për angazhimet dhe kërkesat për marrjen e statusit, javën e ardhshme Brukseli mund të nisë rekomandimin e pritur.

Më 18 prill, Presidenti i Ukrainës, Volodymyr Zelensky i dorëzoi zyrtarëve të BE-së një pyetësor të plotësuar për të aplikuar për marrjen e statusit të shtetit kandidat në BE.

Dhënia e statusit të shtetit kandidat për Ukrainën do të vendoset nga anëtarët e bllokut, të cilët do të veprojnë sipas këshillave të ekspertëve të Komisionit Evropian.

Nëse miratohet statusi i shtetit kandidat, Ukraina do të duhet të kalojë nëpër një proces të ndërlikuar dhe potencialisht të gjatë të pranimit, ku duhet të dëshmohet përmbushja e standardeve rigoroze demokratike dhe të sundimit të ligjit.

Por, duke pasur parasysh pushtimin e paprovokuar rus të Ukrainës, zyrtarët e BE-së kanë thënë se ata do të punojnë që të përshpejtojnë këtë proces./REL

Qyteti i Mariupol është në rrezik të një shpërthimi të madh kolere pasi Rusia lufton për të ofruar shërbime publike bazë për banorët e rajoneve që ka pushtuar në Ukrainë, ka thënë Ministria e Mbrojtjes e Mbretërisë së Bashkuar.

“Ukraina pësoi një epidemi të madhe kolere në 1995 dhe ka përjetuar shpërthime të vogla që atëherë, veçanërisht rreth bregut të detit Azov – që përfshin Mariupolin”, tha ministria duke shtuar se raste të izoluara ishin raportuar në qytet që nga maji, shkruan Aljazeera.

“Shërbimet mjekësore në Mariupol ka të ngjarë tashmë pranë kolapsit: një shpërthim i madh kolere në Mariupol do ta përkeqësojë më tej këtë”, shtoi ministria.

Ministria tha gjithashtu se rajoni i pushtuar Kherson po përjetonte mungesë ilaçesh.

Kujtojmë se kolera është një sëmundje akute diarreike e shkaktuar nga infeksioni i zorrëve me bakteret “Vibrio cholerae”. Njerëzit mund të sëmuren kur gëlltisin ushqim ose ujë të kontaminuar me bakteret e kolerës.

Infeksioni është shpesh i butë ose pa simptoma, por ndonjëherë mund të jetë i rëndë dhe kërcënues për jetën.

Qeveria e Finlandës planifikon të ndryshojë legjislacionin e kufirit për të lejuar ndërtimin e barrierave në kufirin e saj lindor me Rusinë.

Kjo si një lëvizje për të forcuar gatishmërinë kundër kërcënimeve hibride në mes të pushtimit të Ukrainës nga Rusia.

Finlanda, e cila aktualisht është duke aplikuar për anëtarësim në aleancën ushtarake perëndimore në NATO, ka një histori luftërash me Rusinë, megjithëse aktualisht zona kufitare e mbuluar me pyje midis dy vendeve është shënuar vetëm me shenja dhe vija plastike për pjesën më të madhe të 1300 kilometra të saj, shkruan Aljazeera.

Qeveria finlandeze ka nxituar të forcojë sigurinë kufitare pasi ka frikë se Rusia mund të tentojë të ushtrojë presion mbi Finlandën duke dërguar azilkërkues në kufijtë e saj – siç e akuzoi Bashkimi Evropian për Bjellorusinë në fund të vitit të kaluar, kur qindra emigrantë nga Lindja e Mesme, Afganistani dhe Afrika u mbërthyen në kufirin polak.

Sipas rregullave ekzistuese të BE-së, migrantët kanë të drejtë të kërkojnë azil në çdo pikë hyrjeje në një vend anëtar të BE-së. Ndryshimet do të lejojnë gjithashtu ndërtimin e barrierave, të tilla si gardhe, si dhe rrugë të reja për të lehtësuar patrullimin kufitar në anën finlandeze.

Zëvendësdrejtori i shërbimit të inteligjencës ushtarake të Ukrainës i tha theguardian se Ukraina po humb terren në vijën e frontit dhe se tani mbështetet pothuajse ekskluzivisht në armët që do t’i dërgojë Perëndimi.

“Kjo tani është një luftë artilerie. E ardhmja tani do të vendoset në skajet e fushëbetejës dhe ne po humbasim në aspektin e artilerisë”, tha Vadim Skibickij.

“Tani gjithçka varet nga ajo që na jep Perëndimi. Ukraina ka artileri për 10 deri në 15 rusë. Partnerët tanë perëndimorë na kanë dhënë rreth 10 për qind që na kanë premtuar”, shtoi ai.

“Ne kemi shpenzuar pothuajse të gjithë municionin tonë të artilerisë dhe tani po përdorim granatat e NATO-s. Evropa po na furnizon gjithashtu me granata të kalibrit më të ulët”, tha ai.

Presidenti ukrainas, Volodymyr Zelensky tha javën e kaluar se 60 deri në 100 ushtarë ukrainas vdesin çdo ditë dhe 500 të tjerë plagosen.

Skibicki beson se konflikti në të ardhmen e afërt do të jetë kryesisht artileri dhe se numri i sulmeve me raketa që mund të lëshohen nga Rusia dhe të godasin civilët do të mbetet në nivelin aktual. 

Turqia tha më 8 qershor se një plan i Kombeve të Bashkuara për të krijuar korridor detar për eksportet e drithërave ukrainase, që do të mbikëqyrej nga Ankaraja, ishte plan “i arsyeshëm”, por kërkoi më shumë bisedime me Moskën dhe Kievin për t’u siguruar që anijet do të ishin të sigurta.

Pushtimi rus i Ukrainës, që nisi në shkurt, ka ndaluar eksportet e drithërave të Kievit nga portet e Detit të Zi, duke kërcënuar për një krizë globale të ushqimit. Kombet e Bashkuara dëshirojnë që të dyja palët, por edhe shteti fqinj, Turqia, të pajtohet për krijimin e një korridori.

Por, ka pengesa të mëdha për të arritur një marrëveshje, përfshirë edhe përpjekjet për ta bindur Rusinë që të lehtësojë bllokadën e porteve ukrainase dhe Kievi të largojë minat që ka vendosur.

Pasi të tejkalohen këto pengesa duhet të binden kompanitë transportuese se korridori është i sigurt për t’u përdorur. Koha për të tejkaluar këto pengesa po mbaron dhe ka pak vend në depo për të ruajtur drithërat e reja të Ukrainës, që korren në fund të korrikut.

Lajmin e plotë mund ta lexoni këtu.

Presidenti ukrainas, Volodymyr Zelensky sot ka bërë thirrje që Rusia të përjashtohet nga Organizata e Ushqimit dhe Agrokulturës e Kombeve të Bashkuara për ndikimin që lufta e saj në Ukrainë ka pasur në pasigurinë ushqimore globale.

“Nuk mund të bëhet fjalë gjithashtu për anëtarësimin e vazhdueshëm të Rusisë në FAO – Organizatën e Ushqimit dhe Bujqësisë të Kombeve të Bashkuara”, ka thënë Zelensky gjatë një fjalimi të enjten në Organizatën për Bashkëpunim Ekonomik dhe Zhvillim.

Të 193 vendet anëtare të OKB-së janë gjithashtu anëtarë të FAO.

Lufta në Ukrainë mund të rrisë numrin e “njerëzve akute të pasigurt ushqimor” në mbarë botën me 47 milionë këtë vit, në një total prej 323 milionë, sipas parashikimeve të reja në një raport të përbashkët  nga FAO dhe Programit Botëror të Ushqimit, shkruan CNN.

Sekreti i superfuqisë së grave ukrainase qëndron në qëndrueshmërinë e tyre, tha Olena Zelenska, gruaja e Presidentit Volodymyr Zelensky, shkruan BBC.

Duke folur përmes videolidhjes në konferencën e Këshillit Evropian për Gratë në Konflikte më herët, zonja e parë ukrainase tha: Çdo jetë në vendin tonë është e prishur, çdo jetë është e ndarë në para dhe pas.

“Sigurisht që lufta jonë ka fytyrën e një gruaje sepse ka dy milionë më shumë gra se burra në Ukrainë. Por jam absolutisht e sigurt se gratë ukrainase nuk mund të quhen viktima, ne të gjithë kemi historitë tona të rezistencës. Shumica e mjekëve dhe infermierëve tanë janë gra, ata po luftojnë, po trajtojnë ata që janë të plagosur, ata kujdesen për gratë në lindje, ata janë mësuese, japin mësime nga strehimoret ose ndonjëherë nga jashtë.”, tha ajo.

Zelenska u shpreh se shumica e punonjësve socialë dhe nëpunësve civilë janë gra dhe po vazhdojnë të punojnë, ndërsa femrat vullnetare janë ende duke punuar në vijën e parë.

“Gjysma e sipërmarrësve të vendit janë gra, duke mbajtur ekonominë në këmbë”, tha Zelenska, dhe “nënat tona ukrainase arritën të kalonin mijëra kilometra për të shpëtuar fëmijët e tyre”.

Presidenti ukrainas, Volodymyr Zelensky dhe Presidenti francez, Emmanuel Macron diskutuan për mbështetjen humanitare dhe ushtarake gjatë një telefonate të enjten, sipas një deklarate nga qeveria franceze.

Sipas deklaratës, Macron tha se vendi i tij “do të mbetet i mobilizuar për të përmbushur nevojat e Ukrainës, duke përfshirë armët e rënda”.

Macron gjithashtu e pyeti Zelenskyn për nevojat e tij “përsa i përket pajisjeve ushtarake, mbështetjes politike, mbështetjes financiare dhe ndihmës humanitare”, shkruan CNN.