Një njeri i mrekullueshëm ka vdekur, një demokrat i madh dhe një kampion i rendit botëror shumëpalësh. Jam e pikëlluar, së bashku me familjen e tij, miqtë e tij dhe gjithë popullin japonez, deklaroi sot presidentja e Komisionit Evropian, Ursula von der Leyen.
“Kjo vrasje brutale dhe frikacake e Shinzo Abe ka tronditur të gjithë botën”, shtoi ajo.
“Ish-kryeministri japonez, Shinzo Abe vdiq, pas një atentati gjatë një takimi elektoral”, sipas raporteve të medias.
Një person u arrestua nga policia në Nara, në Japoninë Qendrore, pasi qëlloi sot ish-kryeministrin Shinzo Abe, i cili merrte pjesë në një takim elektoral.
Sipas medias lokale, 41-vjeçari me emrin Tetsuya Yamagami, ishte një ish-anëtar i Forcave Japoneze të Vetëmbrojtjes.
Yamagami përdori një lloj arme gjahu të punuar, me tytë të shkurtër, të fshehur në një çantë.
Sulmuesi i është shmangur survejimit të agjentëve të sigurisë dhe i është afruar ish-kryeministrit, duke qëlluar dy të herë nga një distancë shumë e afërt.
Më vonë sulmuesi u përpoq të largohej, por u ndalua nga policia.
