Sekretari i përgjithshëm i Kombeve të Bashkuara Antonio Guterres bëri thirrje sot që ekspertët e Agjencisë Ndërkombëtare të Energjisë Atomike (IAEA) të vizitojnë centralin bërthamor të Zaporozhzhia sa më shpejt të jetë e mundur.
“Unë mirëpres mbështetjen e shprehur për një mision të tillë dhe bëj thirrje që ai të ndodhë sa më shpejt të jetë e mundur”, tha Guterres në mbledhjen e Këshillit të Sigurimit të OKB-së.
Ai shprehu shqetësim serioz për situatën në termocentralin bërthamor Zaporozhzhia.
“Çdo veprim që mund të kërcënojë sigurinë e centralit bërthamor është thjesht i papranueshëm. Çdo përshkallëzim i mëtejshëm i situatës mund të çojë në vetëshkatërrim”, tha Guterres.
Siç theksoi ai, duhet të sigurohet siguria e termocentralit bërthamor dhe të "rikthehet statusi civil".
Zaporozhzhia është centrali bërthamor më i madh evropian, i cili ka qenë nën kontrollin e forcave ruse që nga marsi, ndodhet afër vijave të frontit dhe javët e fundit është ekspozuar ndaj granatimeve të përsëritura, gjë që ka shkaktuar frikën e një fatkeqësie bërthamore.
Ukraina dhe Rusia akuzojnë njëra-tjetrën për granatimet e zonës përreth centralit bërthamor.
