Presidenti i Ukrainës, Volodymyr Zelensky, deklaroi sot se Evropa do të bartë pasojat nëse vëzhgon me qetësi shkatërrimin nga Rusia dhe vlerësoi se Moska zyrtare krijoi artificialisht krizën energjetike për ta përdorur në mënyrë tinëzare.
Duke folur përmes video-lidhjes në Forumin e 17-të Strategjik në Bled të Sllovenisë, Zelensky tha se çmimet e larta të gazit, pezullimi i shpërndarjes së gazit dhe grurit u krijuan artificialisht nga Rusia.
Zelensky paralajmëroi se asnjë vend evropian nuk është i sigurt nga Rusia, pasi që propaganda ruse është e gatshme të shkatërrojë gjithçka ukrainase.
“Propaganda ruse thotë se populli ukrainas nuk ekziston. Ndërsa ne po luftojmë këtë agresion, ne po mbrojmë Evropën. Ata vrasin civilë, gra dhe fëmijë. Ata po shkatërrojnë blloqet dhe qytetet tona. Rusët kanë krijuar kampe filtrimi që i ndajnë fëmijët nga prindërit dhe i adoptojnë ilegalisht në Rusi”, tha Zelensky.
Zelensky shtoi se përveç propagandës ruse fajin e kanë edhe ata që heshtin për gjithçka që po ndodh. Ai tha se lufta filloi në vitin 2014 dhe se në gjashtë muajt e fundit Rusia ka shkatërruar kontinentin evropian.
“Asnjë nga vendet tuaja nuk është i sigurt nga këta kriminelë lufte që kanë duar të përgjakur dhe pastaj vijnë te ju si turistë. Terrori rus është diçka që na ndjek të gjithëve, përfshirë të gjithë qytetarët e Bashkimit Evropian. Nëse nuk luftojmë kundër këtij terrori, ne në fakt e mbështesim atë”, tha Zelensky.
Ai gjithashtu bëri thirrje për një embargo të plotë kundër Rusisë, si dhe për furnizimin e Ukrainës me armë dhe municione.
